सातौं अधिवेशनको आइतबार बसेको १२ औं बैठकले उक्त विधेयक दफावार छलफलका लागि समितिमा पठाएको हो ।
बुटवल — लुम्बिनी प्रदेश सभा बैठकले ‘लुम्बिनी प्रज्ञा प्रतिष्ठान स्थापना तथा सञ्चालनसम्बन्धी विधेयक’ दफावार छलफलका लागि अर्थ, उद्योग तथा पर्यटन समितिमा पठाएको छ । सातौं अधिवेशनको आइतबार बसेको १२ औं बैठकले उक्त विधेयक दफावार छलफलका लागि समितिमा पठाएको हो ।
बैठकमा उद्योग, पर्यटन तथा यातायात मन्त्री प्रचण्डविक्रम न्यौपानेका तर्फबाट उक्त विधेयक भौतिक पूर्वाधार विकास मन्त्री भूमिश्वर ढकालले प्रस्तुत गरेका थिए । त्यस्तै प्रदेश मामिला तथा कानुन समितिका सभापति दिलकुमारी बुढाले समितिको वार्षिक प्रतिवेदन सभामा पेस गरेकी छन् ।
सातौं अधिवेशनको १३ औं बैठक अब सोमबार दिउँसो १ बजे बस्ने जानकारी गराइएको छ । आइतबारको बैठकमा प्रदेश सभा सदस्यहरूले संघीय सरकारले विद्यार्थी संगठन खारेज गर्ने तयारीप्रति खबरदारी गरेका छन् । प्रदेश सभा सदस्य रत्नबहादुर खत्रीले बैठकमा बोल्दै नेपालको शैक्षिक समस्याको मूल जड विद्यार्थी संगठन नभई शिक्षा प्रणाली रहेको जिकिर गरे ।
बैठकमा प्रदेश सभा सदस्यहरू बसिउद्दिन खाँ, मीनाकुमारी श्रेष्ठ, तुलसीराम शर्मा, चन्द्रकेश गुप्ता, भण्डारीलाल अहिर, भगवती अधिकारी, बादशाह कुर्मी, चिन्तामणि पाण्डेले कृषि क्षेत्रमा अपेक्षित उपलब्धि हासिल हुन नसकेको भन्दै यसतर्फ सरकारको ध्यानाकर्षण गराएका थिए ।
