अर्घाखाँची — धार्मिक पर्यटकीय गन्तव्य सुपा देउराली मन्दिरमा नयाँ वर्षको पहिलो दिन घुम्न र दर्शन गर्न आउने तीर्थालुको संख्या उल्लेख्य रहेको छ । मंगलबार बिहानैदेखि साँझसम्म धार्मिक पर्यटकको घुँइचो लागेको हो । 

मन्दिरमा भारत र नेपालका विभिन्न ठाउँबाट गाडी रिजर्भ गरेरै भित्रिएका थिए । नेपालका एक सय गन्तव्यमध्ये सुपादेउराली मन्दिर एक हो । 

नयाँ वर्ष मनाउन, दर्शन र भाकल गर्न आउने तीर्थालुको संख्या एकै दिन ४५ हजार २ सयभन्दा बढी रहेको मन्दिर व्यवस्थापन समितिका सदस्य एवं सन्धिखर्क नगरपालिका–७ का वडाध्यक्ष चुराबहादुर केसीले बताए । जसबाट २ लाख १० हजार रुपैयाँ भेटी संकलन भएको छ ।  ‘नयाँ वर्षको पहिलो दिन सुपा देउराली मन्दिरको दर्शन गरेपछि ३ सय ६५ दिन नै शुभ हुन्छ, काम सफल र राम्रो हुन्छ भन्ने धार्मिक विश्वास छ,’ उनले भने, ‘निजी गाडी, सार्वजनिक सवारी, बस, मिनीबस, ईभीसहितका गाडी रिजर्भ गरेर भित्रिए । हरेक वर्ष मन्दिरको महिमा बढ्दो छ ।’ 

दर्शक गर्न आएका भक्तजनका सवारी साधनलाई व्यवस्थित गरिएको थियो । गाडीलाई मन्दिरदेखि दुई किमि टाढा नै पार्किङ गरी राखिएको थियो । ट्राफिक जाम नगराउन सन्धिखर्क क्षेत्रमा सुपा खेला र शितगंगा क्षेत्रको लाहुरे टाँसेको ठाउँतिर गाडी पार्किङ गरेर राखी तीर्थालुलाई पैदल मार्गबाट मन्दिरमा ल्याइएको उनले बताए । तीर्थालुले घण्टौं लाइनपछि मन्दिरमा दर्शनका लागि पालो पाएका थिए ।

यो मन्दिर सन्धिखर्क नगरपालिका–७ खाँचीकोट र शितगंगा नगरपालिका–२ सीतापुरमा पर्छ । ट्राफिक व्यवस्थापन र तीर्थालुलाई सहज मन्दिर दर्शन गर्न सशस्त्र र जनपद प्रहरी परिचालन एवं पानी वितरण गरिएको उनले बताए । अधिकांश परिवार नै गाडी रिजर्भ गरेर दर्शन गर्न आएका थिए । 

नयाँ वर्षमा धेरै भीड र अरू दिन दैनिक एक हजार जनाको संख्यामा तीर्थालु भित्रिने गरेको सन्धिखर्क नगरपालिका प्रमुख कृष्णप्रसाद श्रेष्ठले बताए । मन्दिरदेखि दुई किमि नजिकै रहेको चिसो ठाउँ नरपानी–सुपा देउराली क्षेत्रमा पर्यटकीय पूर्वाधार र धर्मशाला भवन लगायतका काम गर्न थप योजना बनाइने उनले बताए । 

‘यसको धार्मिक महत्त्व बेग्लै छ,’ उनले भने, ‘वर्षदिन परिवारमा सुख शान्ति होस् र काममा सफलता मिलोस् भन्ने कामना गर्न र भाकल पूरा गर्न धेरै भक्तजन भित्रिएका हुन । तराई र भारतमा यतिबेला गर्मी हुने भएकाले नयाँ वर्षको दिन पहाडमा गर्मी छल्न, घुम्न र मन्दिर दर्शन गर्न भित्रिनेको संख्या हरेक वर्ष बढ्दो छ ।’ सन्धिखर्क नगरपालिका–६ को नरपानीमा यहाँ आएका पर्यटकलाई सस्तो र सहज बसाइका लागि १२ वटा होमस्टे पनि सञ्चालनमा छन् । 

दर्शन गर्न झापाबाट आएका विनोद सिग्देलले नयाँ वर्षको दिन सुपा देउरालीको मन्दिर दर्शन गरेपछि वर्षभरि सुखशान्ति, खुसी र काममा प्रगति मिल्ने विश्वास रहेको बताए । ‘साथीले भनेर र समाचारमा मन्दिरका बारेमा पढेर आएको हुँ,’ उनले भने, ‘धार्मिकसँगै घुमफिरको यात्रा पनि भयो । यहाँ आएर दर्शन गर्दा, अग्ला पहाड हेर्दा र घुम्दा मन शान्त र आनन्द लाग्यो ।’