नेपालगञ्ज — डिभिजन वन कार्यालय बाँकेले वर्षौँदेखि कार्यालय परिसरमा थन्किएका साइकल र काठका गोलिया लिलाम बिक्री गरेर करिब ४३ लाख राजश्व संकलन गरेकाे छ ।

डिभिजन वन कार्यालय बाँकेका सिनियर डिभिजनल वन अधिकृत शंकरप्रसाद गुप्ताका अनुसार विभिन्न समयमा जिल्लाका विभिन्न स्थानबाट बेवारिसे अवस्थामा बरामद गरिएका साइकल र काठको गोलिया लिलाम प्रक्रियाबाट बिक्री गरिएको हो।

उनका अनुसार कार्यालय परिसरमा वर्षौँदेखि थन्किएका ११९ थान साइकल र २५०१.९३ क्यूफिट खयर, साल, सगुनलगायतको काठका गोलिया बिक्रीबाट भ्याटबाहेक ४२ लाख ८६ हजार ४०० रुपैयाँ राजस्व संकलन भएको हो। जसमध्ये साइकल बिक्रीबाट ७९ हजार र काठबाट ४२ लाख ७ हजार ४ रुपैयाँ प्राप्त भएको उनले बताए। उनले कार्यालय परिसरमा थन्किएका पुराना सामग्रीको व्यवस्थापन क्रमशः अन्य सवडिभिजन वन कार्यालयसम्म विस्तार गरिने जानकारी  दिए।