भैरहवा — लोपोन्मुख स्थानीय रैथाने खानालाई लक्षित गर्दै नयाँ वर्ष २०८३ को पूर्वसन्ध्यामा होटल तथा रेस्टुरेन्ट व्यवसायी संगठन रूपन्देहीले भैरहवामा रैथाने सडक खाना महोत्सवको आयोजना गर्ने भएको छ । 

सडक खाना महोत्सवको यो पाँचौ शृंखला हो । भैरहवामा पत्रकार सम्मेलन गर्दै पाँचौं सिद्धार्थ रैथाने सडक खाना महोत्सव आउँदो चैत ३० गते भैरहवाको रंगशाला रोडमा सञ्चालन हुने जानकारी दिइएको हो । 

संगठका अध्यक्ष राजेश मोहत्राले लोपोन्मुख अवस्थामा पुगेका विभिन्न समुदायका स्थानीय रैथाने खानाका परिकारको संरक्षण गर्ने र आन्तरिक तथा बाह्य पर्यटकमाझ यहाँको खाना चिनाउने उद्देश्यले रैथाने सडक खाना महोत्सवको आयोजना गरिएको बताए । 

महोत्सवमा थारु, मगर, नेवार, गुरुङलगायत मधेसी समुदायका विभिन्न खानाका परिकार उपलब्ध हुने छन् । रैथाने खानाको साथमा भैरहवा र आसपास क्षेत्रका विभिन्न तारे होटलका खानाका परिकारका स्टल पनि महोत्सवमा रहने छन् ।