पाल्पा — पाल्पा उद्योग वाणिज्य संघको १७ औं अधिवेशनबाट समीरमान सिंहको अध्यक्षतामा नयाँ कार्यसमिति चयन भएको छ । सिंहले अध्यक्ष पदका प्रतिस्पर्धी शैलेन्द्र भट्टराईलाई ६८ मतले पराजित गरेका हुन् । सिंहले ५७९ मत पाउँदा प्रतिस्पर्धी भट्टराईले ५११ मत पाए । 

१ हजार २९५ मतदाता रहेकामा अध्यक्षका लागि १ हजार ११२ मत खसेको थियो । २१ मत बदर भएको छ । 
संघको २५ सदस्यीय समितिका लागि ३६ जनाले उम्मेदवारी दिएका थिए । वाणिज्य उपाध्यक्षमा रञ्जना थापा अर्याल ५ सय ३१ मत ल्याएर विजयी भइन् । प्रतिस्पर्धी सुरेन्द्र कर्माचार्यले ३ सय ३६ मत पाए ।

उद्योग उपाध्यक्षमा मुक्तिराम जीसी निर्बिरोध भए । क्षेत्रगत कतिपय सदस्य निर्विरोध भए । क्षेत्र ३ मा विनोद नेपाल र विश्व केसी, क्षेत्र ४ मा नारायण न्यौपाने र नारायणबहादुर पछाई, क्षेत्र ७ मा मोहन बहादुर कुँवर र सविन मल्ल निर्वाचित भए । क्षेत्र १० मा विदुर घिमिरे र सुरेश गोदार, क्षेत्र ११ मा जीवन पाण्डे र कमल पाण्डेय विजयी भए । जीवन पाण्डे र सन्तोष श्रेष्ठको मत बराबर भएपछि गोलाप्रथाबाट जीवन चयन भए ।