कपिलवस्तु — कपिलवस्तुको जनजीवन सहज बनाउने सामूहिक प्रतिबद्धता गरिएको छ ।

महाराजगन्ज नगरपालिका-२ को बर्गदा गाउँमा शनिबार दिउँसो दुई समुदायबीच भएको विवादले जनजीवन असामान्य बन्दै गएको थियो । जिल्लास्तरीय समन्वय/सद्भाव बैठक बसेर आगामी दिनमा कुनै पनि पक्षबाट हिंसात्मक, उक्साहटपूर्ण गतिविधि र साम्प्रदायिक सद्भाव खलबलिने गतिबिधि नगर्ने र हुन नदिने सामूहिक प्रतिबद्धता जनाइएको हो ।

जिल्ला प्रशासन कार्यालयद्वारा तौलिहवामा आयोजित बैठकमा घटनाका केही दोषी पक्राउ परेको र अन्यको खोजी कार्य र अनुसन्धान भइरहेकाले दोषीलाई पक्राउ गरी कानुन बमोजिम कडा कारबाही गर्ने जानकारी गराइएको थियो । घटनामा घाइते भएकाको उपचारका लागि गृह मन्त्रालय र महाराजगन्ज नगरपालिकालाई अनुरोध गर्ने पनि निर्णय गरिएको छ । 

भ्रामक सूचना, घृणाजन्य अभिव्यक्ति र कसैको उक्साहटमा अशान्ति पैदा गर्ने र गैरकानुनी गतिविधि गरेमा स्थानीय प्रशासनले कडा कारबाही गर्ने निर्णय गरिएको छ ।