कपिलवस्तु — महाराजगंज नगरपालिकाको बर्गदा गाउमा शनिबार दिउँसो भएको दुई समुदायबीचको विवादले तनावग्रस्त बनेको तौलिहवा–बहादुरगंज हुलाकी सडक खण्डको जनजीवन सामान्य बन्दै गएको छ । उक्त बाटोमा अहिले निजी सवारी साधनहरु सञ्चालन नभएका छन् । सर्वसाधारणले सहज रुपमा आवतजावत गरिरहेका छन् । 

घटनापछि निमित्त प्रजिअ भविश्वर घिमिरेले सूचना जारी गर्दै शनिबार दिउँसो २ बजेदेखि अर्को आदेश नभएसम्म महराजगंज नगरपालिकाको पूर्व बगर्दी पुल, पश्चिम बहादुरगंज चोक, उत्तर महाराजगंज बजार र दक्षिण हर्दौनासम्म भेला, सभा, जुलुस र प्रर्दशन गर्न नपाउने गरी निषेधाज्ञा जारी गरेका थिए । 

निषेधाज्ञाकै बीच विवाद भएको ठाउँ बर्गदागाउँभन्दा पश्चिम महाराजगंज नगरपालिका वडा नं. ६, जिगना चौराहामा विरोध प्रदर्शन गरिरहेका प्रदर्शनकारी र प्रहरीबीच झडप भएको थियो । प्रदर्शन अनियन्त्रित हुन थालेपछि प्रहरीले गोली चलाएको थियो । हिजोको घटनामा सर्वसाधारण र प्रहरी गरी २३ जना घाइते भएको जिल्ला प्रहरी प्रमुख उपरीक्षक सन्तोष आचार्यले बताए ।