गुल्मी — गुल्मीमा चट्याङ लागेर ३ जना घाइते भएका छन् । शुक्रबार मालिका गाउँपालिका-२ दर्लिङ्गका चट्याङ लागेर ३ जना घाइते भएका हुन् ।

प्रहरीका अनुसार, दर्लिङ्गका ३२ वर्षीया गोमा खड्का, २८ वर्षीया निरु खड्का र २९ वर्षीया विष्णु खड्का घाइते भएको जिल्ला प्रहरी कार्यालय गुल्मीका सूचना अधिकारी प्रहरी नायब उपरीक्षक गंगाबहादुर सारुले जानकारी दिए ।

घाइतेलाई उपचारका लागि गुल्मी अस्पताल ल्याइएको छ । घाइतेमध्ये एक जना बेहोस रहेको प्रहरीले जनाएको छ ।

घटनास्थलमा प्रहरी चौकी पौंदीअमराईबाट प्रहरी नायब निरीक्षक लखनलाल चौधरीको नेतृत्वमा प्रहरी टोली खटिएको थियो । घाइतेको प्राथमिक उपचार लुम्बिनी वामी हस्पिटल वामीटक्सारमा गरिएको थियो ।

साथै चट्याङले नै त्यही ठाउँमा ३ वटा बाख्रा मरेका छन् ।