भैरहवा — रुपन्देही लीलाराम र न्यु होराइजन कलेज यहाँ सञ्चालन भइरहेको जिल्लास्तरीय अन्तर कलेज साई ग्लोबल टी–२० क्रिकेट प्रतियोगिता अन्तर्गत बुधबार विजयी भएका छन् । यहाँस्थित सिद्धार्थ क्रिकेट मैदानमा भएका खेलमा लीलारामले साई ग्लोबल कलेज ‘बी’ लाई २८ र होराइजनले मुनलाइटलाई ६३ रनले पराजित गरेका हुन् ।  

टस जितेर ब्याटिङ रोजेको रुपन्देही लीलारामले निर्धारित २० ओभरमा ७ विकेट गुमाएर १ सय ३१ रन बनायो । लीलारामका रमेश कुर्मीले अविजित २३, फैजन मुसलमानले २२, अजय केवटले १६, करण यादवले १२ र हरिकेश मुराउले १० रन जोडे । बलिङतर्फ साई ग्लोबल ‘बी’ का विष्णु कटरिया र अमनसिंह घर्तीले समान २–२ तथा विराज यादव र आरभसिंह पौडेलले १–१ विकेट लिए ।

जवाफमा साई ग्लोबल ‘बी’ ले १८ ओभर २ बलमा सबै विकेट गुमाएर १ सय ३ रन मात्र बनायो । साई ग्लोबलका विकाश यादवले ४५, विष्णु कटरियाले २१ र अभिशेक सुनारले १६ रन  बनाए । बलिङमा लीलारामका करण यादवले ४, प्रेमसागर यादवले २ तथा हरिकेष मुराउ, रमेश कुर्मी र कलम मुसलमानले १–१ विकेट लिए । 

अर्को खेलमा टस जितेर ब्याटिङ गरेको न्यु होराइजनले ६ विकेटको क्षतिमा २ सय ३ रन बनायो । उसका लागि आरिफ खानले ६२, विप्रसन केसीले २९, संगम पाण्डेले २८, अमर मिश्रले २५ र सिद्धार्थ ढकालले २१ रन जोडे । बलिङमा मुनलाइटका निश्चल ज्ञवाली, निरज मल्ल र दिलसाद अलीलले समान २–२ विकेट लिए ।