पाल्पा — पाल्पा- सिद्धार्थ राजमार्ग अन्तर्गत पाल्पा–बुटवल सडक खण्डमा शनिबार भएको दुर्घटनामा मृत्यु भएको दुई जनाको पहिचान खुलेको छ । 

पाल्पादेखि बुटवलतर्फ जाँदै गरेको लु ४९ प ७७९५ नम्बरको मोटरसाइकललाई सोही दिशातर्फ गइरहेको लु २ ख १८८३ नम्बरको टिप्परले ठक्कर दिँदा भएको दुर्घटनामा दुई जनाको मृत्यु भएको हो । 

पाल्पाको तिनाउ गाउँपालिका–३, दोभान बजार नजिकै भएको दुर्घटनामा गुल्मी जिल्ला कालीगण्डकी गाउँपालिका अन्तर्गत साविकको पुर्तीघाट गाविस–४, का ३१ को मिलन सार्की भएको नागरिकता भेटिएको जिल्ला प्रहरी कार्यालय पाल्पाले जनाएको छ । 

अर्की मृतक बुटवल उपमहानगरपालिका–८, सुख्खानगर बस्ने २८ वर्षीय सीता राना रहेको प्रहरी नायव उपरीक्षक होम प्रकाश चौधरीले जानकारी दिए । उनका अनुसार दुर्घटनामा मोटरसाइकल चालक पुरुष र महिला घाइते भएको जानकारी पाउनासा प्रहरी चौकी दोभानबाट प्रहरी टोली खटिई घाइतेहरुलाई उपचारको लागि लुम्बिनी प्रादेशिक अस्पताल बुटवल पठाएको प्रहरीले जनाएको छ । 

अस्पताल पुर्‍याउँदा डाक्टरले जाँच गर्दा मृत घोषणा गरेका थिए । दुर्घटनामा मोटरसाइकल ठक्कर दिने टिप्पर चालक र सवारी साधन प्रहरीको नियन्त्रणमा रहेको छ ।