नेपालगन्ज — आगामी फागुन २१ गतेको प्रतिनिधिसभा निर्वाचनमा बाँके जिल्लामा २ हजार ३३८ जना अस्थायी मतदाता रहेको पाइएको छ ।

समानुपातिकतर्फ मतदान गर्नका लागि हालसम्म संकलन गरिएको संख्या अनुसार जिल्लामा उक्त संख्यामा अस्थायी मतदाता रहेको पाइएको हो। 

जिल्ला निर्वाचन कार्यालय प्रमुख टेकबहादुर शाहीले जिल्लामा हालसम्म संकलन गरिएको संख्या अनुसार २ हजार ३३८ जना अस्थायी मतदाताको नामावली प्रकाशित गरिएको बताए। 

जिल्लामा कार्यरत सुरक्षाकर्मी, निजामति र संस्थान अन्तरगतका कर्मचारी, कारागारमा रहेका बाहिरी जिल्लाका कैदीबन्दीको विवरण संकलन गरेर नामावली प्रकाशित गरिएको उनले बताए। 

यसअघि निर्वाचन कार्यालयले विभिन्न निकायसँग अस्थायी मतदाताको संख्या र नामावली माग गरेको थियो। तीमध्ये नेपाल प्रहरीको नामावली अझै प्राप्त नभएकोले यो संख्या बढ्ने उनले बताए।