दाङ — लुम्बिनी प्रदेशको नवौं स्थापना दिवस मनाइएको छ । लुम्बिनी प्रदेश सरकार र लुम्बिनी प्रदेश सभाको संयुक्त आयोजनामा राप्ती उपत्यका (देउखुरी) मा मूल समारोह आयोजना गरेर बुधबार स्थापना दिवस मनाइएको हो ।

मूल समारोहको उद्घाटन गर्दै प्रदेश प्रमुख कृष्णबहादुर घर्तीमगरले प्रदेशको दिगो विकास र समृद्धिका लागि सबै पक्ष जिम्मेवार बन्नुपर्ने बताए ।‘यो प्रदेश संवेदनशील पनि छ । राम्रो पनि छ । कस्तो बनाउने भन्ने कुरा शासन गर्नेहरूको काँधमा छ,’ उनले भने, ‘हामीले लुम्बिनी प्रदेशलाई फरक ढंगले चलाउनुपर्छ । हाम्रो अरूसँग प्रतिस्पर्धा पनि छ । राम्रोसँग काम गर्न सक्यौं भने धेरै राम्रो प्रदेश बन्न सक्छ ।’

सबै पक्ष र तहको आवाज प्रदेशले सुन्नुपर्ने धारणा राख्दै उनले इतिहासको कालखण्डमा शासन गर्नेहरूको निर्णयका आधारमा ठाउँहरूको विकास भएको स्मरण गरे । 

लुम्बिनी प्रदेशका मुख्यमन्त्री चेतनारायण आचार्यले प्रदेश स्थापना भएको आठ वर्ष पूरा हुँदै गर्दा संघीयतालाई बलियो बनाउने काम प्रदेशबाट भएको बताए । संघीयताका कारण जनताको घर-आँगनमा विकास पुगेको र जनताले त्यसको अनुभूति गर्न पाएको उनको भनाइ थियो ।‘आज संघीयताका कारण प्रदेश स्थापना भयो । प्रदेशले गरेका कामहरूको अनुभूति नागरिकले गर्न पाएका छन्,’ उनले भने, ‘आज केही भएन, प्रदेश बोझिलो भयो भन्नेहरूलाई एकपटक प्रदेशमा भएको खर्चहरूको विवरण हेरेर मात्रै मूल्यांकन गर्न अनुरोध गर्दछु ।’

प्रदेश बोझिलो नभई विकास निर्माणको आधारका रूपमा स्थापित हुँदै गएको उनले स्पष्ट पारे । यसका साथै मुख्यमन्त्री आचार्यले प्रदेश सरकारले सुशासन, पारदर्शिता, जवाफदेहिता र भ्रष्टाचार अन्त्यका लागि पाँचवर्षे रणनीतिक योजना बनाएर लागू गरेको जानकारी दिए ।‘अहिले सुशासन र पारदर्शिताको कुरा बढी उठाइएको छ । प्रदेश सरकारले पहिल्यै यस क्षेत्रमा कानुनी आधार तयार पारेर काम गरिसकेको छ,’ उनले भने, ‘प्रदेशको काम र जिम्मेवारी कुशलतापूर्वक निर्वाह गर्न सफल भएका छौं ।’

प्रदेश सभामुख तुलाराम घर्तीमगरले प्रदेश सभा र प्रदेश सरकारले जनताको आधारभूत आवश्यकतासँग जोडिएका क्षेत्रमा कानुन निर्माण गर्ने र अनुभूति हुने गरी कार्यान्वयन गर्ने पक्षलाई बलियो बनाउँदै लगेको बताए । उनले ऐन र कानुन निर्माण गरेर प्रदेशलाई यो अवस्थासम्म ल्याउन सफल भएको पनि बताए ।‘कानुन निर्माणमा लुम्बिनी प्रदेश अन्य प्रदेशको तुलनामा अग्रणी स्थानमा छ । कार्यान्वयन तहमा पनि त्यसैगरी अघि बढिरहेको छ,’ उनले भने, ‘अब हामी जनतासँग जोडिएका कानुन बनाउने गरी भूमिका बढाइरहेका छौं ।’

पूर्व मुख्यमन्त्री जोखबहादुर महराले प्रदेशको विकासका लागि सुशासन आवश्यक रहेको बताए । समृद्ध र आत्मनिर्भर प्रदेश बनाउन पूर्वाधार तथा मानवीय श्रमशक्तिको विकास अनिवार्य रहेको उनले बताए । ‘लुम्बिनीलाई समृद्ध र आत्मनिर्भर प्रदेश बनाउन कृषि र पर्यटनलाई केन्द्रमा राखेर योजना बनाउन आवश्यक छ,’ उनले भने, ‘समृद्धिको कामलाई अघि बढाउन सुशासन चाहिन्छ । त्यस दिशामा प्रदेशले कामको गति बढाउन जरुरी छ ।’