परासी — रामग्राम नगरपालिका–१५ स्थित साना किसान कृषि सहकारी संस्थामा शेयर सदस्यहरुले पाँच दिनदेखि तालाबन्दी गरेका छन् ।

२०६४ सालमा स्थापना भएको सहकारीले रासायनिक मलको वितरण, बचत संकलन र ऋण प्रवाह गर्दै आइरहेको छ्। एक वर्षदेखि सञ्चालक समिति र व्यवस्थापकबीचको टकरावको कारण सहकारीमा समस्या आएपछि बचतकर्ता रकम डुब्ने चिन्तामा छन् । 

लामो समयदेखि साधारणसभा र नेतृत्व चयन प्रक्रिया अनुसार नभएको भन्दै सदस्यहरुले माघ ७ गते तालाबन्दी गरेका छन् । तालाबन्दी गरेपछि नगरपालिकाले समस्या समाधानको लागि पहल गरिदिने आशामा तालाबन्दी गरेका हुन् । 

बचतकर्ताले समयमा बचतफिर्ता नपाएको ऋण प्रवाह नभएको र समयमा नै मल नपाएको गुनासो गर्दै आएका छन् । १ हजार १ सय सदस्य रहेको संस्थामा सञ्चालक समितिको पदावधि सकिएको १ वर्ष हुँदा समेत साधारणसभा र अधिवेशन नभएकाले तालाबन्दी गरेको संस्थाका सल्लाहकार रामदेव बानियाँले बताए। ‘व्यवस्थापक र अध्यक्षको लडाइँका कारण उपभोक्ता मारमा परियो,’ बनियाँले भने, ‘दुःखमा काम लाग्ला भनेर गरेको बचत समस्या पर्दा झिक्न नपाएपछि के काम लाग्यो ।’