दाङ — एमाले महासचिव एवं लुम्बिनी प्रदेशका संस्थापक मुख्यमन्त्री शंकर पोख्रेलको उम्मेदवारी दर्ता गर्न जाँदै छन् । उनको दर्ता समय दिउँसो १ बजे तोकिएको भए पनि उनी अझै घोराहीस्थित निर्वाचन आयोगको कार्यालयमा पुगेका छैनन् ।

घोराहीस्थित निर्वाचन आयोगको कार्यालयमा दाङ क्षेत्र नम्बर २ बाट उनले उम्मेदवारी दर्ता गर्नेछन्। सांस्कृतिक झाँकीसहित बजार परिक्रमा गरी निर्वाचन कार्यालय जाने तयारी भइरहेको एमाले जिल्ला उपाध्यक्ष मनोहर बुढाथोकीले बताए।

फागुन २१ गते हुने प्रतिनिधिसभा सदस्य निर्वाचनका लागि उनी पुनः क्षेत्र नम्बर २ बाट प्रतिस्पर्धा गर्न लागेका हुन्।

२०७९ को निर्वाचनमा उनी यही क्षेत्रमा तत्कालीन माओवादी केन्द्रकी नेतृ रेखा शर्मासँग १ सय ९३ मतान्तरले पराजित भएका थिए। माओवादी केन्द्र र कांग्रेसको गठबन्धनबाट उम्मेदवार बनेकी शर्माले २६ हजार ८ सय ८० मत प्राप्त गरी विजयी भएकी थिइन् भने पोख्रेलले २६ हजार ६ सय ८७ मत पाएका थिए। पोख्रेल २०७४ मा दाङ २ (१) बाट प्रदेशसभा सदस्यमा निर्वाचित भई लुम्बिनी प्रदेशका संस्थापक मुख्यमन्त्री बनेका थिए।