गुल्मी — गुल्मीका दुवै प्रतिनिधिसभा निर्वाचन क्षेत्रमा निर्वाचन कार्यालय स्थापना भएका छन्।

जिल्लाकाे पूर्वी क्षेत्रलाई समेटेको क्षेत्र नम्बर १ सहितको दुवै क्षेत्रकाे मुख्य निर्वाचन कार्यालय जिल्ला समन्वय समितिकाे कार्यालय तम्घासमा स्थापना गरिएको छ। जसमा मुख्य निर्वाचन अधिकृत कृष्णप्रसाद पाैडेल छन्।

जिल्लाकाे पश्चिम क्षेत्र समेटेकाे क्षेत्र नम्बर २ काे कार्यालय शिक्षा विकास तथा समन्वय इकाई तम्घासमा स्थापना गरिएको छ। जसमा निर्वाचन अधिकृत हरिहर पाैडेल छन् । फागुन २१ काे प्रतिनिधिसभा निर्वाचनका लागि कार्यालय स्थापना गरिएका हुन्।

गुल्मीमा २ लाख २९ हजार ५ सय ४९ जना मतदाता रहेको जिल्ला निर्वाचन कार्यालय गुल्मीका प्रमुख ऋषि घिमिरेले बताए। उनका अनुसार महिला १ लाख १५ हजार २ सय १० जना, पुरुष १ लाख १४ हजार ३ सय ३७ जना र अन्य दुई जना मतदाता रहेका छन्।

गत निर्वाचनको तुलनामा अहिले मतदाताको संख्या पाँच हजार २ सय ७३ ले बढेको छ। हालसम्म यस जिल्लामा १ सय ४५ मतदान स्थल र २ सय ८४ मतदान केन्द्र रहेको घिमिरेले बताए।

क्षेत्र नम्बर १ मा १ लाख २२ हजार १ सय ८६ जना मतदाता रहेका छन् । जसमा महिला ६२ हजार २ सय ७२ जना र पुरुष ५९ हजार ९ सय १४ जना मतदाता रहेका छन् । यस क्षेत्रमा ८३ मतदानस्थल र १ सय ५५ मतदान केन्द्र कायम गरिएको छ।

निर्वाचन क्षेत्र नम्बर २ मा १ लाख ७ हजार ३ सय ६३ जना मतदाता रहेका छन् । जसमा महिला ५२ हजार ९ सय ३८ जना, पुरुष ५४ हजार ४ सय २३ जना र अन्य दुई जना मतदाता रहेका छन् । यस क्षेत्रमा ६२ मतदान स्थल र १ सय २९ मतदान केन्द्र छन् । गुल्मी हेभिवेट नेताहरूकाे जिल्ला भए पनि चुनावी सरगर्मी भने तातिसकेको छैन् ।