दाङ — माघ ११ गते हुने राष्ट्रिय सभा सदस्य निर्वाचनका लागि एमालेबाट रामकुमारी झाँक्रीले मनोनयन दर्ता गरेकी छिन् । घोराहीस्थित निर्वाचन अधिकृतको कार्यालयमा उनले महिला कोटामा लुम्बिनी प्रदेशबाट मनोनयन दर्ता गरेकी हुन् ।

झाँक्री गत कात्तिक २४ गते मात्र एमालेमा फर्किएकी थिइन् । उनीसहित कृष्णकुमार श्रेष्ठलगायतका नेताहरू एमालेमै फर्किएका थिए  ।  नेकपा एकीकृत समाजवादी माओवादी केन्द्रसहितका दलसँगको एकतामा गई नेपाली कम्युनिस्ट पार्टी बनाए पनि झाँक्रीलगायतका नेताहरू भने एमालेमै फर्किएका हुन् ।

लुम्बिनी प्रदेशमा एक अपांगता, एक महिला र एक खुला गरी तीनवटा कलस्टरमा मनोनयन दर्ता भएको मुख्य निर्वाचन अधिकृत प्रकाशप्रसाद पण्डितले बताए । जसमा कांग्रेस र एमालेले तालमेल गरी मनोनयन दर्ता गरेका छन् । कांग्रेसबाट अपांग कोटामा दाङका वासुदेव घिमिरे र खुला कोटामा गुल्मीका चन्द्र केसीले मनोनयन दर्ता गरेका छन् ।