दाङ — राष्ट्रिय सभा सदस्य निर्वाचनका लागि लुम्बिनी प्रदेशबाट आठ जनाको मनोनयन दर्ता भएको छ । बुधबार घोराहीस्थित निर्वाचन अधिकृतको कार्यालयमा कांग्रेस–एमाले गठबन्धनबाट तीन, नेपाली कम्युनिष्ट पार्टीबाट तीन र राष्ट्रिय जनमोर्चाबाट दुई जनाको उम्मेदवारी दर्ता भएको हो ।

माघ ११ गते हुने निर्वाचनमा लुम्बिनी प्रदेशबाट महिला, अपांगता/अल्पसंख्यक र अन्य गरी तीन जना सदस्य निर्वाचित हुँदैछन् । जसका लागि कांग्रेस र एमालेले तालमेल गरी उम्मेदवारी दर्ता गराएका छन् । एमालेको भागमा महिला कोटा परेको थियो भने कांग्रेसलाई अपांग र अन्य समूहबाट परेको थियो । जस अनुसार एमालेबाट मदाने गाउँपालिका–४, गुल्मीकी रामकुमारी झाँक्रीको उम्मेदवारी परेको छ ।

झाँक्री पूर्व सहरी विकास मन्त्री हुन् । उनी नेकपा एकीकृत समाजवादीको केन्द्रीय सचिव थिइन् । हाल उनी पुनः एमालेमा फर्किएपछि राष्ट्रियसभा सदस्यको उम्मेदवारी बन्ने अवसर पाएकी हुन् । विद्यार्थी आन्दोलनबाट राजनीतिमा स्थापित भएकी झाँक्री अनेरास्ववियुको पूर्व केन्द्रीय अध्यक्ष पनि हुन् ।

कांग्रेसबाट अपांग कोटामा लमही नगरपालिक–३, दाङका वासुदेव घिमिरे र अन्य कोटामा रेसुङ्गा नगरपालिका–३, गुल्मीका चन्द्रबहादुर केसीले उम्मेदवारी दर्ता गरेका छन् । उनीहरू कांग्रेसका पुराना नेता हुन् ।