परासी — नवलपरासी पश्चिमको बर्दघाट नगरपालिका-१३ का ४० वर्षीय होमबहादुर थापा र भारत उत्तर प्रदेश प्रतापगढ जिल्लाका ३० वर्षको विनोद कुमार बर्दघाट नगरपालिका-१२ स्थित कजारिया टायल्स उद्योगमा बुधबार राति ८ बजेदेखि बिहीबार बिहान ८ बजेसम्म काममा खटिएका थिए ।

नेपाली मजदुर थापाका ५ वर्षका छोरा र श्रीमती छन् ।  उनीहरूको काम कम्पनीको ग्यास चेम्बरमा थियो । राति ८ बजेदेखि काममा खटिएका दुई जना मजदुर आफ्नो काम सकिएपछि पनि बाहिर निस्किएनन् । पछि खोज्दै जाँदा उनीहरू मृत अवस्थामा भेटिएको सूचना प्रहरीमा पुग्यो । 

प्रहरी आएर हेर्दा 'ग्यासी फायर पोकिङ फ्लोर'मा कागजको गत्ता ओछ्याएर सुतिरहेको अवस्थामा दुई मजदुरको शव फेला पारेको थियो । 

जिल्ला प्रहरी कार्यालय पश्चिम नवलपरासीका सूचना अधिकारी प्रहरी निरीक्षक सुशील घिमिरेका अनुसार घटनाको विषयमा उद्योगका म्यानेजर रमेश न्यौपानेले बिहीबार बिहान ९ बजेर २० मिनेट जाँदा अस्थायी प्रहरी पोस्ट भटौलियामा सम्पर्क गरेको र त्यसपछि प्रहरी घटनास्थलमा पुगेर आवश्यक अनुसन्धान सुरु गरेको थियो ।

‘घटनाबारे प्रहरीलाई थाहा पाएलगत्तै हामीले घटनाको विषयमा अनुसन्धान गरिरहेका छौँ । थप कुरा पत्ता लगाउन फरेन्सिक परीक्षण आवश्यक पर्ने हुन्छ,’ घिमिरेले भने, ‘स्थानीय आन्दोलित हुनु भएको छ । शव उठाएर आवश्यक परीक्षण छिटोभन्दा छिटो गर्न सकियो भने सहज हुने छ ।’

मृतकका आफन्तले भने घटनाबारे आफूहरूलाई समयमै खबर नगरिएको भन्दै उद्योग परिसर अगाडि विरोध प्रदर्शन गरिरहेका छन् । उनीहरूले जोखिमपूर्ण काममा लगाएर 'ग्यासी फायरिङ'मा अक्सिजनको कमी भएर मृत्यु भएको भन्दै आवश्यक अनुसन्धान र दोषीलाई कारबाहीको माग गरेका छन् ।