बुटवल — लुम्बिनी प्रदेशका मुख्यमन्त्री चेतनारायण आचार्यले मोफसलको पत्रकारिताको सुदृढीकरण, प्रेस स्वतन्त्रताको संरक्षण र स्थानीय विषयवस्तुमा सार्थक बहस सिर्जना गर्नु आजको आवश्यकता भएको बताएका छन । 

लुम्बिनी प्रेस क्लबद्वारा आयोजित तेस्रो लुम्बिनी न्यूज फेस्टिवलको आइतबार लुम्बिनीमा उद्घाटन गर्दै मुख्यमन्त्री आचार्यले  यो फेस्टिवलले पत्रकारिताको भूमिकालाई अझ प्रभावकारी बनाउने विश्वास पनि व्यक्त गरे ।  मुख्यमन्त्री आचार्यले नेपाल र भारत दुवै देशको विकास र समृद्धिका लागि पत्रकार, निजी क्षेत्र, सामाजिक तथा सांस्कृतिक क्षेत्रबीच सहकार्य आवश्यक रहेको बताए । 

शनिबारबाट सुरु न्युज फेस्टिवलमा भारतका विभिन्न सञ्चारमाध्यमका ४० बढी पत्रकार र नेपालका राष्ट्रिय र मोफसलका सञ्चारमाध्यमका नेतृत्व तहका सञ्चारकर्मीको उपस्थिति रहेको छ । दुवै देशका सञ्चारकर्मीबीच हुने बहस र छलफलले नेपाल र भारतबीचको सम्बन्धलाई पनि थप बलियो बनाउन दुवै देशको पत्रकारिता क्षेत्रको योगदान महत्त्वपूर्ण रहने मुख्यमन्त्री आचार्यले बताए । ‘मिडियाबाट नकारात्मक समाचार प्रवाह भए सम्बन्ध कमजोर हुन सक्छ । सकारात्मक र तथ्यमा आधारित समाचारले आपसी सम्बन्ध बलियो बन्छ,' उनले भने, ‘सम्मेलन र संवादले सीमा क्षेत्र र दुई देशको सम्बन्ध सुदृढ बनाउन महत्त्वपूर्ण भूमिका खेल्ने छ ।’