गुल्मी — मदन भण्डारी राजमार्ग अन्तर्गत रिडी-तम्घास खण्डमा थप डेढ किलोमिटर सडक स्नराेन्नतिकाे काम सुरु भएको छ ।

रिडीदेखि रुन्खादहसम्म भइरहेको काम थप भएर रुन्खादह घुम्तीदेखि राजासम्म स्तराेन्नतिकाे काम अगाडि बढेको हो ।

२०८२ जेठ २५ मा सम्झौता भई १० करोड ८६ लाख रुपैयाँमा १.७४ किलोमिटर सडक निर्माणकाे काम तिरुपाते निर्माण सेवा/ॐ नम जेभी दाङले गरिरहेकाे मदन भण्डारी राजमार्ग याेजना कार्यालय गुल्मीका सूचना अधिकारी हुमनाथ पाैडेलले जानकारी दिए । २०८३ जेठ २५ मा सम्पन्न गर्नुपर्ने उक्त काम हालसम्म पाँच प्रतिशत भाैतिक प्रगति भएको छ ।

सडक फराकिलो गरी डेढ/डेढ मिटर दायाँबायाँ छाडेर बीचमा सात मिटर सडक पक्की हुनेछ । यसअनुसार रिडीदेखि रुन्खादहसम्म काम भइरहेकाे थियाे । अब थप १७ सय मिटरमा काम अगाडि बढेको हो । यसपछि याे खण्डको ४५ किलोमिटर सडकमध्ये २६ किलोमिटर ७ सय मिटर सडक फराकिलोसहित पक्की हुनेछ ।