अर्घाखाँची — आगामी माघ ११ र फागुन २१ मा हुने राष्ट्रियसभा र प्रतिनिधिसभा सदस्य निर्वाचनका लागि कांग्रेस अर्घाखाँचीले प्रतिनिधिसभा प्रत्यक्ष र समानुपातिक एवं राष्ट्रियसभामा गरी १७ जना उम्मेदवारको नाम सिफारिस गरेको छ । सिफारिस पर्नेमा प्रत्यक्षमा ८, समानुपातिकमा ६ र राष्ट्रियसभामा ३ जना रहेका छन् ।

प्रतिनिधिसभा सदस्य प्रत्यक्षमा पूर्वराज्यमन्त्री रेवतीप्रसाद भुसाल, लुम्बिनी प्रदेश सह–महामन्त्री विष्णुप्रसाद खनाल, पूर्वजिल्ला सभापति कमलप्रसाद भुसाल, महाधिवेशन प्रतिनिधिहरू डा. मुक्तिराम श्रेष्ठ, डा. जयबहादुर टण्डन, लेखनाथ पोखरेल, जिल्ला उपसभापति बाबुराम भुसाल र ताराप्रसाद श्रेष्ठलाई सिफारिस गरेको जिल्ला सचिव कृष्णप्रसाद खनालले बताए । 

समानुपातिकतर्फ केन्द्रीय सदस्य एवं पूर्वउपसभामुख पुष्पा गौतम भुसाल सिफारिस भएकी छन् । ०७९ को चुनावमा कांग्रेस, माओवादीसहित पाँच दलीय गठबन्धन हुँदा समेत भुसाल एमालेका टोपबहादुर रायमाझीसँग पराजित भएकी थिइन् । उनी प्रत्यक्षबाट पछि हटेर ‘सेफ जोन’ रोजेकी छिन् । त्यस्तै निर्मला क्षेत्री, दलित महिलाबाट ललिता सुनार, दलित पुरुष मणिराम परियार, खस आर्य राजेन्द्र केसी र विष्णुप्रसाद अर्याल सिफारिस भएका छन् । 

राष्ट्रियसभामा महाधिवेशन प्रतिनिधि डा. रामबहादुर बीसी, पूर्वजिल्ला सभापति पीताम्बर भुसाल र आमन्त्रित पूर्वकेन्द्रीय सदस्य बालकृष्ण पाण्डे सिफारिस भए ।

कांग्रेस केन्द्रले प्रत्यक्षमा दुई पुरुष र एक महिलाको नाम मंसिर २४ भित्र पठाउन जिल्ला कार्यसमितिलाई सर्कुलर गरेको थियो । कांग्रेस युवाहरूले ०५१ सालदेखि हालसम्म उम्मेदवार भएका पुराना नेतालाई फेरि सिफारिस नगरी बिदाइ गर्नुपर्ने, प्रत्यक्ष, समानुपातिक र राष्ट्रियसभामा एक–एक जनाको नाम सिफारिस गर्न खबरदारी गरेका थिए । दबाबपछि गत बिहीबार र शुक्रबार दुई दिन बसेको जिल्ला कार्यसमिति बैठकबाट उम्मेदवार सिफारिस गर्न रोकिएको थियो । 

सिफारिस भएका मध्ये रेवतीप्रसाद भुसाल, डा. बीसी र पुष्पा हालसम्म सांसद र उम्मेदवार भएका छन् । नयाँ अनुहारका उम्मेदवारलाई युवाले सिफारिस नगर्न दबाब दिएका थिए । रेवती ०४८ र ०५१ को चुनाव जितेर पर्यटन राज्यमन्त्री भए । त्यसपछिका चुनावका लागि उनी सिफारिस मात्रै भए, टिकट पाएनन् । बीसी तीनपटक उम्मेदवार बने । तर, पराजित भए । पुष्पा ०६४ मा तत्कालीन निर्वाचन क्षेत्र नं. २ बाट निर्वाचित भइन् । ०७४ मा समानुपातिक सांसद बनेर उपसभामुख बनिन् । तीनवटा चुनावमा पराजित भइन् । पुष्पाले अहिले समानुपातिक रोजिन् । 

आकांक्षी धेरै भएपछि केन्द्रले तोकेको मापदण्ड विपरीत तोकिएभन्दा धेरै उम्मेदवार सिफारिस गरिएको जिल्ला सभापति केशव श्रेष्ठले जानकारी दिए । सहमतिका लागि अधिकांश प्रयत्न गरे पनि उम्मेदवारका धेरै आकांक्षी भएकाले सबैको नाम पठाइएको उनले बताए । आफ्नो मागअनुसार सिफारिस नगरेको भन्दै कांग्रेस युवाहरू आक्रोशित भएका छन् । कांग्रेस प्रदेशसभा २ का उपसभापति अर्जुन पोखरेलले जिल्लाले माग सुनुवाइ नगरेपछि केन्द्रमा ज्ञापनपत्र दिन जाने बताए ।