पाल्पा — पाल्पाको निस्दी गाउँपालिका–४, मित्यालमा भएको जीप दुर्घटनामा मृत्यु हुनेको संख्या ४ पुगेको छ ।

नवलपुर मध्यविन्दु नगरपालिका–१३ का ३४ वर्षीय सुन्दर विकको उपचारका क्रममा पूरानो मेडिकल कलेज चितवनमा मृत्यु भएको हो ।

दुर्घटनामा घटनास्थलमै मृत्यु हुनेहरु निस्दी गाउँपालिका–४, मित्याल ठोक्सिङबासकी ४५ वर्षीया ओम कुमारी खाम्चा र निस्दी गाउँपालिका–७, ज्यामिरे हुवासकी ३६ वर्षीया हेम कुमारी सारु, नवलपुर मध्यविन्दु नगरपालिका–१३ की ३१ वर्षीय बुद्धिमाया विक रहेको जिल्ला प्रहरी कार्यालय पाल्पाले जनाएको छ । सुन्दर र बुद्धीमाया श्रीमान् श्रीमती हुन् ।

रामपुर–मित्याल–अरुणखोला सडक खण्ड अन्तर्गत निस्दी गाउँपालिका–४, मित्याल च्युरीबास नजिकै एकलफोक्सिङ्ग भन्ने स्थानमा लु १ ज ३९०८ नम्बरको जिप दुर्घटना भएको थियो । दुर्घटनामा परी आठ यात्रु घाइते भएका थिए । घाइतेमध्ये १० वर्षीय लविस सुनार र ५ वर्षकी प्रिन्सा सुनार सुन्दर र बुद्धीमायाका छोराछोरी रहेको प्रहरीले जनाएको छ ।

निस्दी गाउँपालिका–४, मित्याल लामेदमारका ७३ वर्षीय नरबहादुर सुनारी ७२ वर्षीय भूमीसरा सुनारी, मित्यालीकै २८ वर्षीय सुनारीको उपचार भइरहेको छ । मिनाकुमारीको पूरानो मेडिकल कलेज चितवनमा उपचार भइरहेको छ ।