गुल्मी — वैकल्पिक सडक वा चोकमा सडक निर्माणको काम चलिरहेको सूचना नहुँदा सवारीले अर्को वैकल्पिक सडक प्रयोग गर्न वा सडक बन्द रहेको मनस्थितिमा यात्रा गर्न पाउँदैनन् । जसका कारण सवार यात्रुहरूलाई पर्खाइको मात्र होइन, गन्तव्यमा पुग्नुपर्ने समयको समेत समस्या हुँदै आएको छ ।

जिल्लाको मदन भण्डारी राजमार्गअन्तर्गत रिडी-तम्घास खण्डको धेरै भागमा काम चलिरहेको छ । केही ठाउँमा सानातिना काम चलिरहेका हुन्छन् । त्यसका लागि छुट्टै सूचना बोर्ड भने छैन । सवारी धेरै मात्रामा रोकिएपछि बल्ल सडक खुलाउने प्रचलन छ ।

यस खण्डमा रिडीदेखि रुन्खादहसम्म अधिकांश ठाउँमा सडक कालोपत्र भइसकेको छ । बीचबीचका धेरै ठाउँमा भने निर्माणाधीन अवस्थामै सडक छ । जसका कारण बिना सूचना काम चलिरहँदा आफ्नै गतिमा दौडिरहेका सवारी र गन्तव्यमा पुग्ने यात्रुहरू १५ मिनेटदेखि आधा घण्टा भन्दा बढी समय रोकिनुपर्छ ।

जिल्लाभरमा निर्माणाधीन सडकमा सवारी साधन रोकिनुपर्ने समस्या सामान्य भए पनि बिना सूचना रोकिनुपर्दा अप्ठ्यारो हुने सवारी चालक सागर फुल्देलले बताए । 'सडक बनिरहेको छ, हामीले त्यस्तो अन्यथा लिँदैनौं,' उनले भने, 'सूचना जारी भयो भने भएको ठाउँमा वैकल्पिक सडक र नभएको ठाउँमा त्यस्तै खाले मनस्थितिको यात्रा हुने थियो ।' यस खण्डमा सानातिना काम चलिरहेको ५/७ ठाउँमा बिना सूचना समय-समयमा रोकिनुपर्ने बाध्यता छ । 

यति मात्रै होइन, जिल्लाका प्रायः सडक कटिङ, चौडा, ग्राभेल, नाली निर्माण, ढलान र कालोपत्र गर्ने कामले निर्माणाधीन अवस्थामा नै छन् । जसमध्ये अधिकांश सडकमा बिना सूचना काम चलिरहेको हुन्छ । जसका कारण विभिन्न समस्या हुने गर्दछन् । मदन भण्डारी राजमार्ग गुल्मी खण्ड, कालीगण्डकी करिडोर गुल्मी खण्ड, रुद्रवेणी-वामी खण्ड, रिडी-खर्ज्याङ-सिमिचौर-तम्घास खण्ड र तम्घास-छ्ल्दी-इन्द्रेगौंडा खण्ड सहितका मुख्य खण्डका साथै भित्री ग्रामीण सडकमा समेत काम चलिरहेको छ । जसमा यस्तै समस्या आउने गरेको छ ।