शुक्रबार दिउँसो घाँस काट्ने क्रममा काला बेलभार सामुदायिक वनमा चितुवाले आक्रमण गर्दा ५९ वर्षीय गोपी थारुको मृत्यु भएको हाे ।
बर्दिया — चितुवाको आक्रमणमा बारबर्दिया नगरपालिका–११ मा शुक्रबार एक जनाको मृत्यु भएको छ ।
शुक्रबार दिउँसो घाँस काट्ने क्रममा काला बेलभार सामुदायिक वनमा चितुवाले आक्रमण गर्दा ५९ वर्षीय गोपी थारुको मृत्यु भएको डिभिजन वन कार्यालय बर्दियाका वरिष्ठ वन अधिकृत गोपाल चौधरीले बताए ।
चितुवाले आक्रमणबाट जोगिन भाग्ने क्रममा स्थानीय दुई महिला घाइते भएका छन् । भाग्ने क्रममा घाइते भएका सोही ठाउँकी ईन्दिरा र मनिषा दहितको नगर अस्पताल बारबर्दियामा उपचार भइरहेको जिल्ला प्रहरी कार्यालयका प्रहरी निरीक्षक प्रकाशसिंह कार्कीले बताए ।
चितुवालाई नियन्त्रणमा लिन खोर (केज) सहित प्रहरी, वनकर्मी पठाएको वरिष्ठ वन अधिकृत चौधरीले बताए ।
