भैरहवा — रुपन्देहीमा कृषि र औद्योगिक क्षेत्रमा लगानीका प्रशस्त सम्भावना रहेको जनाउँदै भैरहवाका उद्योगी–व्यवसायीले सहकार्यका लागि नेपालका लागि इजरायली राजदूत स्मुलिम एरी बाससित आग्रह गरेका छन् । 

बिहीबार सिद्धार्थ उद्योग वाणिज्य संघको कार्यालय अवलोकनमा आएका राजदूतसित उद्योगी–व्यवसायीले यस्तो आग्रह गरेका हुन् । राजदूत बास र संघका पदाधिकारीबीच अन्तरक्रियामा दुई मुलुकबीच ज्ञान, सीप र प्रविधि आदानप्रदान गर्न सकिने औंल्याइएको छ । 

संघको कार्यालयमा आएका राजदूतले नेपाल र इजरायलबीच ६५ वर्ष पूरानो कूटनीतिक सम्बन्ध रहेको जनाए । दुई मुलुकबीच सम्बन्ध प्रगाढ बनाउन स्वर्गीय विशेश्वरप्रसाद कोइरालाले महत्वपूर्ण भूमिका खेलेको राजदूत बासले स्मरण गरे ।

सुरुमा नेपालका किसानलाई इजरायलमा लगेर कृषिको विकास, आधुनिकीकरण र प्रविधिबारे सिकाएको उल्लेख गर्दै अहिले कृषि अध्ययनरत विद्यार्थीलाई त्यसतर्फ लग्ने गरिएको जनाए । बुद्ध जन्मस्थल लुम्बिनी र अन्य पर्यटकीय ठाउँको विकासमा सहकार्य गर्न तयार रहेको उनले स्पष्ट पारे । 

भेटघाटका क्रममा राजदूत बासले इजरायलका प्रविधिबारे सिकेर नेपालमा कृषि क्षेत्रको विकासमा प्रयोग गर्न आग्रह गरे । 

इजरायल नेपालको हरेक क्षेत्रको विकासमा साझेदार गर्न तयार रहेको उल्लेख गर्दै उद्योगी व्यवसायीसँग आवश्यक सहकार्य गरिने उनले बताए । निर्यात हुने सामानको उत्पादन गर्न आग्रह गर्दै त्यसमा इजरायलले सहजीकरण गर्ने उनले बताए । राजदूत बासले नियमित उडान गर्न नसकिएपनि गौतमबुद्ध विमानस्थलमा इजरायलबाट कम्तिमा सिजनमा चार्टर्ड उडान गर्न आफूले पहल गर्ने प्रतिबद्धता जनाए ।