गुल्मी — नेकपा एमालेका उपमहासचिव प्रदीप ज्ञवालीले वर्तमान सरकारले  राजनीतिक दलसँग बढाएको दूरीका कारण चुनाव हुनेमा विश्वास नरहेको बताएका छन् । नेकपा एमाले गुल्मीले सदरमुकाम तम्घासमा आयोजना गरेको जनसभालाई सम्बोधन गर्दै शनिबार उनले यस्तो बताएका हुन् । 

संविधानले नचिन्ने प्रधानमन्त्रीकै वरिपरिका व्यक्तिले चुनावमा पुरानै नेता आए उनीहरूको उम्मेदवारी खारेजीको चेतावनी दिइरहेको अवस्थामा वर्तमान सरकार केही नबोल्नु चुनाव गराउन नखोज्नु भएको उनको आरोप छ । 'सरकार चुनाव गराउने दिशामा छैन्, जेनजीका माग अलग छन्,' उनले भने, 'संसद् पुनःस्थापन नहुने र चुनाव पनि नहुने अहिलेको अवस्थाले थप संकट निम्त्याउँछ ।' दलीय व्यवस्थामा राजनीतिक दललाई निषेध गरेर चुनाव नहुने उनले बताए । 

चुनावमा जान नेकपा एमाले तयार रहेको पनि उनको तर्क छ । 'नेकपा एमाले चुनावमा जान तयारै छ,' उपमहासचिव ज्ञवालीले भने, 'चुनावका लागि निष्पक्षता र निर्भयताको ग्यारेन्टी चाहिँ हुनुपर्छ ।'  तर अहिलेको सरकारले त्यसको सुनिश्चितता गराउन नसकेको उनले बताए ।