काठमाडौंबाहिर छरिएर रहेका जेन–जीलाई एकजुट गराउन सम्मेलनले सहयोग पुगेको छ भने दृष्टि, उद्देश्य र मूल मान्यताहरू, अधिकार र जिम्मेवारी, जवाफदेहिता र अनुगमन संयन्त्रका विषयमा घोषणापत्रमा उल्लेख छ । पारदर्शिता र भ्रष्टाचार नियन्त्रण, युवा प्रतिबद्धतासमेत घोषणापत्रमा रहेको स्याङ्जाबाट सहभागी प्रवेश अर्यालले बताए । 

बडापत्रमा प्रत्येक निर्णय जनहितमा हुने र देशभरका युवालाई दण्डहीनताको अन्त्य, सुशासन, जवाफदेही राजनीति र भ्रष्टाचारविरुद्धको साझा अभियानमा संगठित गर्नु सम्मेलनको उपलब्धि हुने जेन–जीको अगुवाइ गरेको विज्ञान घिमिरेले बताए । 

रचनात्मक सहभागिता, समुदाय र राष्ट्रप्रतिको सेवा भावना, एकता र सहिष्णुता कायम राख्ने, उत्तरदायी नेतृत्व अभ्यास गर्ने विषय बडापत्रमा उल्लेख भएको पाल्पाका जेन–जी अगुवा सुशील बस्यालले बताए । 

अनुगमन प्रक्रियाअन्तर्गत बडापत्रमा वडा, पालिका तथा जिल्ला स्तरीय समीक्षा, प्रादेशिक तथा केन्द्र समितिसँगको समन्वय बडापत्रमा छ । सेवा प्रवाह तथा विकास निर्माणको कार्यमा अनुगमन तथा समन्वयअन्तर्गत नागरिक गुनासो प्रणाली, प्रत्यक्ष समन्वय, फोन, क्यूआर, गुनासो बक्स र अनलाइन फर्म राखिनेछ । यस्तै गोपनीयता र सुरक्षाको प्रत्याभूति ७ दिनभित्र समाधानको सुरुवात हुने बडापत्रमा उल्लेख छ ।