पाल्पा — पाल्पाको छहरामा बुधबार भएको ईभी दुर्घटनामा तीन जनाको मृत्यु भएको छ । दुर्घटनामा ईभीका चालक ३१ वर्षीय कमल रायमाझीको निधन भएको छ भने अन्य दुई जनाको पहिचान खुलेको छैन । घटनास्थलमा प्रहरी भर्खर पुगेको छ । चालक रायमाझी रैनादेवी छहरा–४, अमलावासका हुन् ।

लुम्बिनी प्रदेश ०१–००१ ज ००९१ नम्बरको दुर्घटनाग्रस्त ईभी गाडीमा चालकसमेत तीन जना रहेको छहराका स्थानीयले जानकारी दिएका छन् । बुटवलबाट पाल्पा सदरमुकाम तानसेन हुँदै रैनादेवी छहराको मेहलढापतर्फ जाने क्रममा ईभी गाडी रैनादेवी छहरा–४, छहरा बोखर नजिकै भन्ज्याङमा दुर्घटनामा परेको रैनादेवी छहरा गाउँपालिकाका कार्यपालिका सदस्य महेश बरालले जानकारी दिए । उनका अनुसार दुर्घटनाग्रस्त ईभी सडकदेखि झन्डै २०० मिटर तल खोल्सामा पुगेको छ ।

स्थानीय होटल व्यवसायीका अनुसार करिब साढे ११ बजे छहराबाट हिँडेको ईभी धेरै समयसम्म मेहलढाप नपुगेपछि खोजीकार्य भएको थियो । खोजी गर्दै जाँदा दुर्घटनामा परेको जानकारी साढे एक बजे तिर इलाका प्रहरी कार्यालय मुझुङ्ले पाएको हो ।

‘२० मिनेटमा मेहलढाप पुग्नुपर्ने ईभी दुई घण्टामा नपुगेपछि खोजी गरिएको थियो,’ स्थानीय बरालले भने, ‘त्यसपछि मात्र गाडीको खोजी कार्य गरिएको हो ।’