अर्घाखाँची — जमिनभन्दा ५५ मिटरमाथि छाँगोबाट छङछङ खसेको झरना पर्यटकका लागि रमाइलो गन्तव्य बनेको छ । अग्लो पहाड, वरिपरि हरियाली मनोरम दृश्यसहितको जंगल, चिसो हावापानी र बीचमा भीरबाट झरेको पानीको फोहराले पछिल्लो समय आन्तरिक पर्यटकलाई यहाा आकर्षित गरेको हो ।

भूमिकास्थान नगरपालिका–९ र १० को बीचमा रहेको मृगस्थली झरनालाई संघीय सरकारको ५८ लाख रुपैयाँको बजेटमा संरचना निर्माण भएपछि यो पर्यटकीय गन्तव्य बन्दै गएको छ । यहाँ टाढाटाढाबाट गाडी रिर्जव गरेरै घुम्न आउँछन् । पदमार्ग र अन्य संरचना निर्माण गरेपछि पर्यटकलाई सहज भएको छ । 

सन्धिखर्कबाट झरना हेर्न पुगेका स्वास्थ्यकर्मी अशोक चौहानले करिब दुई घण्टा समय बिताए । ‘यहाँ चिसो पानी र आनन्दको ठाउँ रहेछ,’ उनले भने, ‘चारैतिरको हरियाली मनोरम दृश्यले मोहित बनायो । झरना जति हेर्‍यो, त्यति नै रमाइलो लाग्यो ।’ सिढीमा ओहोरदोहोर गरेर फोटो, भिडियो खिचे । फेसबुक, टिकटक लगायतका सामाजिक सञ्जालमा थुप्रै तस्बिर र भिडियो पोस्ट गरे । ‘यहाँ त रिफ्रेस हुने गन्तव्य रहेछ,’ उनले भने, ‘झरनामा बस्दा छुट्टै आनन्द लाग्यो ।’

अग्लो छाँगोबाट धूवाँजस्तै पानीको फोहरा खस्दा झरनाको अनुपम र मनोरम सुन्दर दृश्य देखेर अचम्मित मान्छन् । यही झरनाबाट मृग लडेर मरेकाले यसको नाम मृगस्थली झरना राखिएको स्थानीय बताउँछन् ।