व्यवसायीले खसीको मासुको मूल्य प्रति किलो १ सय रुपैयाँ मूल्यवृद्धि गर्ने निर्णय गरेकोमा प्रशासनले रोक लगाएपछि व्यवसायी पसल बन्द गरेर आन्दोलनमा उत्रिएका हुन्।
दाङ — मूल्य वृद्धिको माग गर्दै घोराहीका मासु व्यवसायीले मासु पसलहरू बन्द गरेका छन् । खसी मासु व्यवसायी समिति घोराहीको बुधबार बसेको बैठकले शनिवारदेखि लागू हुने गरी मासुमा प्रति किलो १ सय रुपैयाँ मूल्यवृद्धि गर्ने निर्णय गरेको थियो ।
जिल्ला प्रशासन कार्यालय दाङले उक्त निर्णय कार्यान्वयन नगर्न निर्देशन दिएपछि शनिवारदेखि नै व्यवसायीहरू आन्दोलित भएको समितिका अध्यक्ष असलाम कुरेशीले बताए ।
जिल्लाका अन्य बजारहरूमा खसीको मासु प्रतिकिलो एक हजार रुपैयाँ पुगेको र घोराहीमा पनि सोहीअनुसार वृद्धि गरेकोमा प्रशासनले रोकेको उनले बताए ।
अन्य बजारमा मूल्य पाउने भएपछि किसानहरूले घोराही भन्दा अन्य बजारमा नै खसी बिक्री गरिरहेको र जसका कारण घोराहीमा खसी नै अभाव भइरहेको उनले गुनासो गरे । मूल्यवृद्धिको निर्णय लागू नहुँदासम्म मासु पसल बन्द गरिने उनले बताए।
