गुल्मी — गुल्मीको मालिका गाउँपालिका–७ का १९ वर्षीय शशिधर पन्थी तीन वर्षअगाडि दुवै मिर्गौला फेल भएर पीडित थिए । त्रिवि शिक्षण अस्पतालमा उपचाररत उनको परिवारमा आर्थिक अवस्था कमजोर थियो । 

उनलाई बचाउन सामाजिक सञ्जाल फेसबुकमा अभियान नै चल्यो । उक्त अभियानमार्फत दुई लाख ७८ हजार रुपैयाँ संकलन भयो । जसले उपचारमा निकै सहज बनायो । उनी हाल पनि उपचाररत छन् । सामाजिक सञ्जालकै कारण संकलन भएको आर्थिक रकमले उनको मिर्गौला उपचारमा सहायता दिएको थियो । 

०००

२०७७ भदौ २१ मा राँगाले लखेटेपछि मदाने गाउँपालिका–२ का खगिश्वरा पोखरेलको मेरुदण्ड भाँचियो । उनी आर्थिक अभावमा उपचारबाट वञ्चित भइन् । सामाजिक सञ्जालबाटै विदेशबाट घटना थाहा पाएपछि आर्थिक सहयोग भएपछि उनको उपचारमा सहजता भयो । उनले दुई लाख रुपैयाँ सामाजिक सञ्जालकै माध्यमबाट सहयोग पाइन् । जसले गर्दा उनले राम्रोसँग उपचार गरिन् । 

०००

पाँच वर्षअगाडि माथिबाट खसेको पहिरोले मालिका–७ कै ८१ वर्षीय नरबहादुर विकको घर पूर्ण रुपमा ध्वस्त बन्यो । २३ वर्षीय छोरालाई भारतमा गुमाएका उनी र उनकी श्रीमती घरबासविहीन बनेका थिए । जुन खबर सामाजिक सञ्जाल फेसबुकमा फैलियो । जसका कारण उनलाई आर्थिक सहयोग जुट्यो । कुल एक लाख २० हजार रुपैयाँ संकलन भएपछि उनको घर बन्यो । उनीहरु अहिले त्यही बनेको घरमा आनन्दसँग बसिरहेका छन् । 

०००

इस्मा गाउँपालिका–१ का दीपक खत्री घाँटीको क्यान्सरबाट पीडित छन् । हाल चितवन क्यान्सर अस्पतालमा उपचाररत उनको उपचारमै सम्पत्ति सकियो । त्यसपछि उनलाई आर्थिक सहयोग उठ्न थाल्यो, त्यो पनि सामाजिक सञ्जाल फेसबुककै माध्यमबाट । हालसम्म उनका लागि २ लाख रुपैयाँ आर्थिक सहयोग आएको छ । 

०००

इस्मा गाउँपालिका–२ का मेखबहादुर कुमाल घरको छानो मर्मत गर्ने क्रममा लडेर गम्भीर घाइते भए । उनी हाल बुटवलमा उपचाररत छन् । उपचारमा आर्थिक अभाव भएपछि सामाजिक सञ्जाल फेसबुकबाट उनलाई आर्थिक संकलन हुन थालेको छ । हालसम्म पनि आर्थिक संकलन जारी रहेको उनको उपचार जारी छ । सञ्जालबाटै आर्थिक सहयोग भएपछि उनको उपचारमा निकै राहत बनेको छ । 

इस्मा गाउँपालिका–२ को पालुखा माध्यमिक विद्यालयका शिक्षक बाबुराम पन्थीले यो अभियान चलाएका हुन् । ‘छिमेकी दाजुभाइ उपचारमा हुनुहुन्छ, आर्थिक अवस्था कमजोर छ,’ उनले भने, ‘सहयोगी माध्यम सामाजिक सञ्जाल बन्यो, जसका कारण उपचारमा सहजता भएको छ ।’ उनले घटनाबारे सामाजिक सञ्जाल फेसबुकमा राखेपछि सहयोग उठेको र अस्पतालमै पुगेर हस्तान्तरण गरेको उनले बताए । उनले नै कुमालका लागि पनि १ लाख ८० हजार रुपैयाँ सहयोग गरेका छन् ।

०००

प्रयोग गर्न जाने सामाजिक सञ्जाल कतिसम्म प्रभावकारी छ भन्ने अर्को उदाहरण हो, मालिका–८ को थानपति आधारतभूत विद्यालयले स्थापना गरेको अक्षयकोष । फेसबुककै प्रयोग गरेर १० लाख ७० हजार रुपैयाँको अक्षयकोष विद्यालयले खडा गरेको छ ।

मात्र ६ महिनाको अवधिमै फेसबुकबाटै आह्वान गरेर उक्त रकम संकलन भएको विद्यालय व्यवस्थापन समितिका अध्यक्ष डीबी खड्काले बताए । ‘हाम्रो अभियान सामाजिक सञ्जालमै चर्चा गरेका हौं,’ उनले भने, ‘फेसबुकबाटै जानकारी पाएर धेरैले सहयोग गर्नुभयो ।’ उनले स्थानीयले मात्रै नभई छिमेकी पालिका मदाने गाउँपालिका, दाङ र काभ्रेपलाञ्चोकबाट समेत आर्थिक सहयोग प्राप्त भएको बताए । उक्त रकमबाट आउने ब्याज विद्यालयको दीर्घकालीन शैक्षिक विकासका लागि प्रयोग गर्ने विद्यालयको योजना छ । न्यूनतम आधारभूत आवश्यकता परिपूर्तिका लागि वार्षिक १ लाख ८० हजार रुपैयाँ बराबरको सहयोग भएको उनले बताए । सामाजिक सञ्जालकै कारण पारिवारिक उत्सवको अवसरमा समेत सहयोग प्राप्त भएको खड्काको भनाइ छ ।