पाल्पा — महिला बालबालिकामाथि हुने हिंसाविरुद्ध न्याय सम्बोधनका लागि रामपुर नगरपालिकाले सिफारिस प्रणाली कार्यविधि–२०८२ सार्वजनिक गरेको छ ।

घरेलु हिंसा प्रभावित महिला तथा बालबालिकालाई छिटो, छरितो र प्रभावकारी सेवा उपलब्ध गराउन तयार गरिएको कार्यविधि सार्वजनिक गरिएको हो । कार्यविधि सार्वजनिक गर्दै राष्ट्रिय सभा सदस्य राजेन्द्रलक्ष्मी गैरेले विभिन्न कानुन निर्माणमा ढिलाइ हुँदा जनताले अनुभूति गर्ने गरी संघीय लोकतान्त्रिक गणतन्त्रात्मक व्यवस्थालाई पूर्ण संस्थागत गर्न नसकेको बताइन् । 

कार्यविधिले हिंसामा परेका नागरिकलाई सेवा दिन सहजता प्रदान गर्ने भन्दै उनले स्थानीय सरकारको एकल अधिकारअन्तर्गत कार्यविधि तयार भएको र सकेसम्म हिंसा हुन नदिने र भइहालेमा न्याय सुनिश्चित गर्ने बताइन्गै ।

रामपुर नगरपालिकाका प्रमुख रमणबहादुर थापाले स्थानीय सरकारलाई संविधानले अधिकार दिए पनि स्पष्ट कार्यविधि नहुँदा आफ्नै अधिकारभित्रका काम गर्न कठिनाइ हुने गरेको बताए । महिला तथा बालबालिकामाथि हुने हिंसाविरुद्ध न्याय दिन यस कार्यविधि ऐतिहासिक भएको उनको भनाइ थियो ।