पाल्पा — १४ जिल्लाका विद्यार्थीलाई पाल्पा टेक्निकल इन्स्टिच्युटले पहिलो पटक दीक्षित गरेको छ । इन्स्टिच्युटले हेल्थ असिस्टेन्टका ३९ जना विद्यार्थीलाई सोमबार दीक्षित गरेको हो । हेल्थ असिस्टेन्ट र ल्याब टेक्निसियनको पठनपाठन हुँदै आएको यस इन्स्टिच्युटले ३०औँ वार्षिकोत्सवका अवसरमा यहाँ अध्ययन गर्न आएका विद्यार्थीलाई प्रथम दीक्षान्त समारोह राखेको प्रिन्सिपल त्रिलोचन पौड्यालले बताए ।

कार्यक्रममा लुम्बिनी प्रदेशका सामाजिक विकास मन्त्री जन्मजय तिमिल्सेना, लुम्बिनी प्रदेशसभा सदस्य तथा पूर्वमन्त्री बीरबहादुर राना, इन्स्टिच्युटका अध्यक्ष भेषराज नेपाल, प्रिन्सिपल त्रिलोचन पौड्यालले टोपी पहिर्याउनुका साथै प्रमाणपत्र प्रदान गरेका थिए ।

हेल्थ असिस्टेन्ट तहमा पहिलो ब्याचले आफ्नो पठनपाठन पूरा गरेका छन् भने विभिन्न विद्यामा सर्वोत्तम विद्यार्थीहरू विभिन्न पदक तथा पुरस्कारबाट पुरस्कृत भएको प्रिन्सिपल पौड्यालले बताए ।

पाल्पा टेक्निकल इन्स्टिच्युटले हेल्थ असिस्टेन्ट र ल्याब टेक्निसियनको पठनपाठन हुनुअघि अनमी, सिएमए, ल्याब असिस्टेन्ट र अहेब कार्यक्रम संचालन गर्दै आएको थियो ।

लुम्बिनी प्रदेशका सामाजिक विकास मन्त्री तिमिल्सेना प्राविधिक शिक्षा अध्ययन गर्ने प्राविधिक जनशक्ति अहिलेको श्रम बजारका लागि आवश्यक रहेको बताए । मन्त्री तिमिल्सेना अनुसार पहाडी जिल्लामा रहेको यस इन्स्टिच्युटले लुम्बिनी प्रदेशका धेरै जिल्लाका विद्यार्थीलाई सेवा दिएको र आगामी दिनमा थप विद्यार्थीलाई गुणस्तरीय शिक्षा दिने अवसर रहेको बताए ।

‘श्रम बजारमा आवश्यक रहेको हेल्थ असिस्टेन्ट (एचए) र ल्याब असिस्टेन्ट अध्यापन गराएर सरकारलाई ठूलो सहयोग पुगेको छ,’ उनले भने, ‘अहिले प्राविधिक जनशक्तिलाई रोजगार र स्वरोजगारमा समस्या छैन ।’

लुम्बिनी प्रदेशसभा सदस्य बीरबहादुर रानाले आफूलाई विज्ञ र दक्ष बनाउन सिकाइलाई अझ बढाएर लैजान विद्यार्थीलाई आग्रह गर्दै इन्स्टिच्युटले सयौं विद्यार्थीलाई उत्तीर्ण गराएर दुर्गम गाउँसम्म पुगेर सेवा गर्न सक्षम बनाएको बताए ।

जिल्ला समन्वय समिति पाल्पाका प्रमुख टंकनाथ खनालले पाल्पाका मात्र नभई अन्य जिल्लाका विद्यार्थीलाई पनि प्राविधिक शिक्षा दिलाएको बताए ।

तानसेन नगरपालिकाका नगरप्रमुख सन्तोषलाल श्रेष्ठले दुर्गमका विपन्न परिवारका विद्यार्थीले पनि तानसेनमा आएर सस्तो र सुविधायुक्त पढाइ पढ्न पाएको बताए ।

युनाइटेड मिसन अस्पतालकी प्रमुख डा. रचेल कार्ख, राष्ट्रिय प्रजातन्त्र पार्टीका जिल्ला अध्यक्ष डुलबहादुर कुँवर, नेपाल रेडक्रस सोसाइटी पाल्पा शाखाका सभापति बाबुराम कार्की, समाजसेवी माधव नेपाल, तानसेन नगरपालिका वडा नम्बर १ का वडाध्यक्ष सुनिल बस्याल लगायतले पाल्पामा पहिलो पटक यसरी दिक्षान्त समारोह राखेर विद्यार्थीलाई हौसला बढाएको बताए ।

कार्यक्रममा पाल्पा टेक्निकल इन्स्टिच्युटका प्रिन्सिपल पौड्यालले वार्षिक प्रतिवेदन प्रस्तुत गर्दै आगामी दिनमा इ-लाइब्रेरी, श्रव्यदृश्य सामग्री थप व्यवस्थापन, प्रयोगशालालाई स्तरोन्नति गर्दै लैजाने, शिक्षकलाई थप तालिमको व्यवस्था गर्ने लगायतका काम गरिने बताए ।