बुटवल — राजस्व अनुसन्धान कार्यालय बुटवलले राजस्व चुहावट सम्बन्धी कसुरमा दुई जना विरुद्ध जिल्ला अदालत रुपन्देहीमा अभियोग पत्र दर्ता गरेको छ । रुपन्देहीको तिलोत्तमा नगरपालिका–१६ का रामबहादुर विक र भारतको पञ्जाबस्थित अमृतसर निवासी कुलदीप सिंहले भन्सार प्रज्ञापन तथा आवश्यक कागजातबिनै भन्सार चोरी गरी सुनका गरगहनाहरूको कारोबार गरेको भन्दै कार्यालयले उनीहरू विरुद्ध जिल्ला अदालत रुपन्देहीमा मुद्दा दर्ता गरेको हो ।

राजस्व अनुसन्धान कार्यालय बुटवलका प्रमुख अनुसन्धान अधिकृत विवेक घिमिरेले उनीहरू माथि राजस्व चुहावट अनुसन्धान तथा नियन्त्रण ऐन २०५२ बमोजिम कारबाही प्रक्रिया अगाडि बढाइएको बताए । ‘कुलदिप सिंह र रामबहादुर विकले भन्सार प्रज्ञापन तथा आवश्यक कागजातबिनै ६१ तोला सुनका गरगहना भन्सार छली गरी राजस्व चुहावट गरेको अनुसन्धानमा देखिन्छ,’ उनले भने, ‘त्यसबापतको सजाय र जरिवाना स्वरूप दुई करोड ६२ लाख ७१ हजार २९ रुपैयाँ माग दाबीसहित मुद्दा दर्ता गरिएको हो ।’