भैरहवा — नेपाल र भारतका विभिन्न विश्वविद्यालयका नामबाट नक्कली शैक्षिक प्रमाणपत्र तयार गरेर बिक्रीमा संलग्न आरोपमा एक भारतीय नागरिक पक्राउ परेका छन् । भारतको कानपुर नौaस्तीका २५ वर्षीय अभिषेक यादव पक्राउ परेका हुन् ।

जिल्ला प्रहरी प्रमुख प्रहरी उपरीक्षक प्रदीपबहादुर क्षेत्रीका अनुसार यादवको साथबाट नक्कली शैक्षिक प्रमाणपत्र, विभिन्न कागजपत्र, स्ट्याम्प (छाप), होलोग्राम, स्टिकर लगायत सामाग्री बरामद भएका छन् । गोप्य सूचनाका आधारमा जिल्ला र इलाका प्रहरी बेलहियाको संयुक्त टोलीले सिद्धार्थनगर–१, स्थित मुक्तिनाथ होटलबाट यादवलाई पक्राउ गरिएको क्षेत्रीले जानकारी दिए । 

नक्कली शैक्षिक प्रमाण तयार गर्ने गिरोह नै सक्रिय रहेको प्रहरीले अड्कल गरेको छ । ‘यादव नक्कली शैक्षिक प्रमाणपत्र बनाउने गिरोहका कर्मचारी हुन्,’ प्रहरी उपरीक्षक क्षेत्रीले भने, ‘नेपालबाट शैक्षिक अध्ययनका लागि विदेश जान यस्ता प्रमाणपत्र लागि प्रयोग हुने गरेको खुलेको छ ।’ यस्तो काममा संलग्न अन्यको व्यक्तिको पनि नाम खुलेको उनले बताए । नक्कली शैक्षिक प्रमाणपत्र निर्माणमा संलग्नबारे छानबिन तथा अनुसन्धान सुरु गरिएको उनले बताए ।  

यादवको साथबाट त्रिभुवन विश्वविद्यालयका ट्रान्सक्रिप्ट १ सय थान, ३६ वटा प्रमाणपत्र, होलोग्राम ४ हजार ४० थान, उच्च माध्यामिक शिक्षा परिषद् लेखेको होलोग्राम २ हजार थान, राष्ट्रिय परीक्षा बोर्ड लेखेको होलोग्राम १ हजार ७ सय ग्राम र सीटीईभीटी लेखेको होलोग्राम १ हजार ९ सय थान बरामद भएको प्रहरीले जनाएको छ ।