काठमाडौँ — रोल्पामा शनिबार दिउँसो ट्र्याक्टर र मोटरसाइकल एकापसमा ठोक्किँदा दुई जना घाइते भएका छन् । प्रहरीका अनुसार साढे १ बजेतिर रुन्टीगढी गाउँपालिकाअन्तर्गतको होलेरी बजारस्थित सहिदमार्गमा दुई साधन ठोक्किएका हुन् । 

होलेरीस्थित सहिद मार्गतर्फ हाट बजारबाट आउँदै गरेको लु ४ त २७८९ नम्बरको ट्र्याक्टरसँग विपरीत दिशाबाट आएको रा ४ प ३९१३ नम्बरको मोटरसाइकल ठोक्किएको थियो । 

दुर्घटनापछि मोटरसाइकलका चालक रुन्टीगढी–८ झेनामका २२ वर्षीय दिपेन्द्र कुँवर र पछाडि बस्ने त्रिवेणी गाउँपालिका–२ धनबाङकी १८ वर्षीया आशा पुन घाइते भएका छन् । घाइते भएका उनीहरुमध्ये कुँवरको दाहिने खुट्टा भाँचिएको छ भने पुनको टाउकोमा चोट लागेको छ । 

घाइतेहरुलाई होलेरीस्थित प्राथमिक स्वास्थ्य केन्द्रमा प्राथमिक उपचार गरेर दाङस्थित राप्ती स्वास्थ्य विज्ञान प्रतिष्ठानमा पठाइएको छ ।