चिसापानी, बर्दिया — बाघ हेर्न बर्दिया आएका ललितपुर एकान्तकुनाका जीवन आचार्य जंगल सफारी गर्न नपाउँदा जति दुःखी थिए, बर्दियाको अर्को ‘प्रडक्ट’ कर्णालीमा र्‍याफ्टिङ गरेर प्राकृतिक आनन्द लिन पाउँदा दंग देखिए । ‘नदीको वहावसँगै देखिएको डर र्‍याफ्टिङ गर्दा पाएको आनन्दले कता हरायो पत्तै भएन,’ उनले भने ।

नदीको सुन्दरता, चिसो पानी, प्राकृतिक वातावरण र वन्यजन्तुको मनोरम आवाजले उनी मात्रै होइन, अहिले यहाँ आइरहेका थुप्रै पर्यटक आल्हादित बनिरहेका छन् । उनीहरूमा खुसीको सीमा छैन । अचेल बर्दिया पुग्ने प्रायः पर्यटक र्‍याफ्टिङमा रमाइरहेका छन् । 

बाघ हेर्नका लागि महत्त्वपूर्ण गन्तव्य बनेको बर्दिया राष्ट्रिय निकुञ्जमा वर्षाका कारण जंगल सफारी बन्द भएपछि र्‍याफ्टिङमा आकर्षण बढेको हो । दैनिकजसो नै पर्यटक र्‍याफ्टिङ गर्न आइरहेका छन् । वर्षाका बेला जेठदेखि भदौसम्म यहाँ जंगल सफारी बन्द हुन्छ । 

र्‍याफ्टिङ गर्दा नदीको कलकलाउँदो मिठासपूर्ण आवाजसँगै प्राकृतिक वातावरणमा रमाउन पाउँदा छुट्टै आनन्द आउँछ । शान्त वातावरणमा र्‍याफ्ट खियाउँदै अघि बढ्दा वन्यजन्तु देखिन्छन् कि भनेर उत्तिकै जिज्ञासा र कौतूहल थपिन्छ । कहिलेकाहीँ र्‍याफ्टिङ गर्दा गैंडा, हात्ती र बाघसमेत देखिने गरेका छन् । ‘वर्षाका कारण अहिले नदीमा राम्रो बहाव छ,’ चराविद् राम शाहीले भने, ‘त्यही भएर गजबको एड्भेन्चर हुन्छ । र्‍याफ्टिङ गर्दा देखिने चरा, मनोरम प्र्राकृतिक वातावरण र सुन्दरताले उत्तिकै मोहित गर्छ ।’ 

यहाँ चिसापानी कर्णाली पुलदेखि हात्तीसार (करिब २० किमि), कर्णाली पुलदेखि कोठियाघाट (करिब ३५ किमि) र कर्णालीपुलदेखि सत्तीघाट टीकापुर (करिब २५ किमि) सम्म र्‍याफ्टिङको चलन छ । एउटा र्‍याफ्टमा ८ देखि १० जनाको समूह अटाउँछ । ५ देखि ६ हजार रुपियाँको प्याकेज हुन्छ । जसमा पिक अप, ड्रप, लन्च र ब्रेक फ्रास्टको सुविधा रहेको गैंडा क्याम्प रिसोर्ट बर्दियाका संचालक रामजी थापाले बताए । 

‘र्‍याफ्टिङमा स्वदेशी र विदेशी पर्यटक निकै रमाउने गरेका छन्,’ उनले भने, ‘र्‍याफ्टिङ गर्दा देखिने पानीमा बस्ने वन्यजन्तु डल्फिन, ओंत, सरिसृप र चरालाई देख्दा अझ आल्हादित बनाउँछ ।’ र्‍याफ्टिङ गर्दै जाँदा नदी छेउमा आएर सेतो बालुवामा बस्दा समुन्द्र तटमा बसेको अनुभूति गर्दै खाना र ब्रेकफास्टको आनन्द पनि लिन सकिने उनले बताए । 

सुन्दर दृश्यको आनन्द लिँदै, कहिले टाढाका पहाडको दृश्यालोकन त कहिले नजिकमा चित्तल मृग हेर्दै कर्णालीमा ३५ किलोमिटर र्‍याफ्टिङ गरेको क्षण अविस्मरणीय भएको पत्रकार महासंघ लुम्बिनी प्रदेश पूर्वअध्यक्ष वसन्त गिरीले बताए । ‘सेतो बालुवामा बस्दा समुन्द्र तटमा आराम गरेको अनुभूति हुँदो रहेछ,’ उनले भने, ‘र्‍याफ्टिङले बर्दियामा पर्यटनको अर्को सम्भावना खोलेको छ ।’ 

हावा भरेर चलाउन मिल्ने डुंगा (र्‍याफ्ट) प्रयोग गरेर पानीको बहावसँगै नदीमा जलयात्रा गराइन्छ । नदीमा र्‍याफ्टिङ गर्दा र्‍यापिड (पानीको भंगालो) मा पौंठेजोरी खेल्दै जानुको अनुभव निकै रोमाञ्चक हुने हुँदा यहाँ निकै आकर्षण बढेको बर्दियाको ठाकुरद्वारास्थित वाइल्ड लाइफ इन्काउन्टर रिर्भर र्‍याफ्टिङका संचालक बलबहादुर रानाले बताए । ‘अझ विदेशी पर्यटक त नदीमा माछा मारेर पनि रमाउने गर्छन्,’ उनले भने, ‘क्याम्पिङ पनि बस्छन् । अहिले दैनिकजसो र्‍याफ्टिङ गर्ने बढेका छन् । यसले बर्दियामा पर्यटक आकर्षण बढाएको छ ।’