पाल्पा — पाल्पामा सोमबार सांस्कृतिक पर्व रोपाइँ जात्रा निकालिएको छ । रोपाइँ जात्रा पर्व धुमधामका साथ मनाउने प्रचलन छ ।

जिल्ला सदरमुकाम तानसेनलगायत नायरनमतलेस, रामपुर, हुमिन, ताहुँ, जब्गादी, सिलुवामा जात्रा निकालिएको छ । तानसेन बजारमा दुई वटा समूहले रोपाइँ जात्रा देखिएको स्थानीय बुद्धिप्रसाद शर्माले बताए । तानसेनको काजीपौवा टोल विकास सस्था, कुसुमडाँडा र तानसेनस्थित देववाणी संस्कृत तथा साधारण माविले पनि यस वर्ष रोपाइँ जात्रा धुमधामका साथ निकालेका छन् । विद्यालयका विद्यार्थीलाई संस्कृति सिकाउने विद्यालयले जात्रा निकालेको प्रधानाध्यापक कृष्ण बहादुर थापाले बताए । 

परम्परागत रूपमा निकालिँदै आएको रोपाइँ यसपटक पनि परम्परा धान्ने काम भएको स्थानीय अगुवाले बताए छन् । स्थानीय सरकारको सहयोग नभएपछि केही वर्ष हराउने हो कि भन्ने चिन्ता स्थानीयमा थियो । 

पश्चिम पहाडको मौलिक पर्वका रूपमा रहेको रोपाइँ जात्रामा धान रोप्दा गरिने क्रियाकलापसँग विभिन्न जातजातिको संस्कृति र कला झल्काउने खालको अभिनय गरिन्छ । यसलाई निकाल्नमा भने धेरै खर्च लाग्ने भएकाले समस्या रहेको बुद्धिजीवी शर्माले बताए । 

रोपाइँ जात्रा असारको महिना धानको रोपाइ गरी सकेपछि मनाउने जात्रा हो । यो जनैपूर्णिमाको पर्सिपल्छ दिउँसो र रातीमा निकालिन्छ । जिल्लाका कतिपय ग्रामीण भेगमा दिउँसोमा नभई रातीमा निकालिने गरेको हुमिनका आशिष श्रेष्ठले बताए । यो नेवार संस्कृतिबाट सुरु भएको जात्रा हो । तर पछिल्लो समयमा अन्य जातजातिले पनि निकाल्न सुरु गरेका छन् ।