बर्दिया — बर्दिया राष्ट्रिय निकुञ्जस्थित ठाकुरबाबा नगरपालिका–९ हात्तीसार नजिक खौराहा खोलामा गोहीको आक्रमणमा परी मंगलबारदेखि बेपत्ता भएका युवाको अवस्था अज्ञात छ ।

नेपाली सेना, सशस्त्र प्रहरी बल, नेपाल प्रहरी र स्थानीय बुधबार अबेलासम्म खोजी राखे पनि फेला परेको छैन । खोजी कार्यमा निकुञ्जको दुई वटा हात्ती र मोटरबोटको प्रयोग गरिएको छ । 

निकुञ्जका सूचना अधिकारी एंव वरिष्ठ सहायक संरक्षण अधिकृत सरोजमणि पौडेलले विहीबार बिहानदेखि खोजी कार्य भइरहेको बताए । कर्णाली नदीको भंगालो खौराहा खोलामा गोहीले झम्टेका मधुवन नपा–१ कैलाशीका १९ वर्षीय रुप मिलन थारु बेपत्ता भएको उनले जनाए ।