बुटवल — रूपन्देही-३ मा कार्तिक १७ गते हुने उपनिर्वाचनका लागि राष्ट्रिय स्वतन्त्र पार्टी (रास्वपा) बाट ९ जना प्रतिस्पर्धी देखिएका छन् । रास्वपाले आन्तरिक रूपमा अनलाइनमार्फत इच्छुक उमेदवारको आवेदन माग गरेको थियो । त्यसमा सम्बन्धित क्षेत्र र बाहिर रहेर रास्वपामा सक्रिय रहेकाहरूले समेत चासो देखाएका छन् ।

आवेदन दिएकाहरूको नाम पार्टीको आधिकारिक पेजबाट बिहीबार सार्वजनिक भएको छ । साउन ७ देखि खुला गरिएको आवेदन दिने म्याद बुधबार सकिएको थियो । सार्वजनिक गरिएको नामावलीमा शुलभ खरेल, पाथवेन्द उपाध्याय, डा. लेखजंग थापा, ज्ञानु पौडेल, जितबहादुर गुप्ता, कुसुम महर्जन, रचना क्षेत्री, पुनकुमारी अग्रवाल र मधुप्रसाद अर्याल रहेका छन् । 

आवेदन दिएकामध्ये मधु अर्याल, ज्ञानु पौडेल, कुसुम महर्जन, सुलभ खरेल र डा. लेखजंग थापा मुख्य प्रतिस्पर्धी हुन् । अब आवेदन प्राप्त भएका मध्येबाट भदौ १५ गते आन्तरिक निर्वाचनमार्फत एक जना उमेदवार छनोट हुनेछन् । 

क्षेत्रीय सभापति अर्याल शिक्षण पेसामा आबद्ध छन् । उनी तिलोत्तमाका विद्यालय सञ्चालक हुन् । उनले साउथ एसियन युनिभर्सिटीबाट अटिजममा पीएचडी गरेका छन् । ज्ञानु पौडेल सहकारी अभियन्ता हुन् । यस्तै, डा. लेखजंग थापा न्युरोसर्जन हुन् । केन्द्रीय सदस्य महर्जन रूपन्देहीकै रास्वपा नेतृ हुन् । उनी २०७९ सालको आमनिर्वाचनमा पार्टीको तर्फबाट समानुपातिक सूचीमा थिइन् । उक्त सूचीबाट नाम फिर्ता गरेर उनी उम्मेदवारीको दौडमा सामेल भएकी हुन् ।