यस वर्ष साउन २० गते आएको बाढीले कटान सुरु गरेको छ । वर्षायाम असोजसम्म हुने भएकोले खेत कटानको त्रास उत्तिकै रहेको स्थानीय रघुवीर मल्लाहले बताए । 'सरकारले बबई, भादा, औराही नदी व्यवस्थापन आयोजनाको काम पूरा नहुँदै अन्यत्र स्थान्तरण गरेर ठूलो गल्ती गरेको छ,' उनले भने, 'अब तटबन्ध कहिले हुने, कसले गर्ने त्यतिन जेल हाम्रो खेत नदीले बगाइसक्छ ।'

नेपाल भारत सीमानजिक रहेको उक्त गाउँमा धान, तोरी, गहुँ, तरकारी र मकै उत्पादन हुन्छ । नदी कटान रोक्न स्थायी तटबन्ध बनाउनुपर्ने गाउँलेहरुले माग गर्दै आएका छन् । तटबन्धको काम चालु आवबाट सुरु गर्ने योजना आयोजना स्थान्तरण भएपछि अधुरो रहेको छ ।

यस भेगको दक्षिणबाट नदी कटानले धार परिवर्तन गरिरहेकोले उच्च जोखिम बढेको स्थानीय बताउँछन् । पाँच वर्षअघि यसै गाउँनजिक नेपाल भारत सीमामा रहेको तीन वटा सीमा स्तम्भ बगाएको थियो । यस वर्ष ठूलो बाढी अझै आएको छैन । स्थानीय रमेश लोधले भने, ‘०७१ र ०७४ जस्तो बाढी आए रंगीपुर लगायत रत्नापुरसमेत ठूलो क्षति हुने जोखिम बढेको छ ।'