गुल्मीको कालीगण्डकी करिडोरमा पहिरोका कारण सडक अवरुद्ध भएको छ भने रिडी–खर्ज्याङ सडक पनि अवरुद्ध भएको छ।
गुल्मी — गुल्मीमा कालीगण्डकी करिडोरसहित तीन सडक अवरुद्ध भएका छन्। मंगलबार बिहानदेखि कालीगण्डकी करिडोर, रुद्रवेणी–वामी र रिडी–खर्ज्याङ सडक अवरुद्ध रहेका छन्।
कालीगण्डकी करिडोरका गरगरे, राक्से र कनौटामा पहिरोका कारण सडक अवरुद्ध भएको जिल्ला प्रहरी कार्यालय गुल्मीका सूचना अधिकारी प्रहरी नायब उपरीक्षक गंगाबहादुर सारुले जानकारी दिए। अवरुद्ध उक्त सडकखण्ड कालीगण्डकी गाउँपालिका–१, २ र ३ मा पर्दछ। त्यसैगरी रिडी–खर्ज्याङ सडक पनि अवरुद्ध भएको छ।
सत्यवती गाउँपालिका–६ स्थित डहरे खोला र तल्लोफाँट खोलामा समेत सडक अवरुद्ध भएको छ। यो बुटवल–बुर्तिवाङ सडकखण्डको रुद्रवेणी–वामी खण्डमा पर्दछ।
गुल्मीसहित आसपासका क्षेत्रमा विगत तीन दिनदेखि निरन्तर वर्षा भइरहेकोले पहिरोका कारण सडक अवरुद्ध भएको हो।
