गुल्मी — यस वर्षको वर्षायाममा त्यति धेरै वर्षा नपरे पनि कालीगण्डकी करिडोरको गुल्मी खण्ड सुख्खा पहिरोका कारण पटक पटक अवरुद्ध हुने गरेको छ । चट्टानसहित खसेको पहिरोका कारण मुख्य गरी कालीगण्डकी गाउँपालिका–१ गरगरे र वडा नम्बर ६ बर्लवामा सडक अवरुद्ध हुने गरेको हो ।

असारमै १० पटकभन्दा बढी अवरुद्ध भएको सो सडक साउनपछि पनि पाँच पटक अवरुद्ध भइसकेको छ । बिहीबार बिहान मात्रै पनि गरगरेमा सडक अवरुद्ध भएको जिल्ला प्रहरी कार्यालय गुल्मीका सूचना अधिकारी प्रहरी नायब उपरीक्षक गंगाबहादुर सारूले जानकारी दिए । तर, उक्त सडक बिहीबार बिहान नै खुलेको थियो ।

प्रहरी र जनप्रतिनिधिको सक्रियतामा निर्माण व्यवसायीले अवरुद्ध सडक खुलाउन सहयोग गरिरहेका छन् । जिल्ला विपद् व्यवस्थापन समितिले गुल्मीस्थित सडकहरू अवरुद्ध भएमा निर्माण भइरहेको वा सडक हस्तान्तरण नभएको अवस्थामा निर्माण गरिरहेको व्यवसायीले सडक खुलाउने निर्णय गरेको थियो । हाल करिडोरको अवरुद्ध सडक कालिका कन्स्ट्रक्सनले खुलाइरहेको कम्पनीका प्रतिनिधि महेश सुवेदीले जानकारी दिए । सडक अवरुद्ध हुनासाथ खुलाइने गरेको उनले बताए ।