भैरहवा — लुम्बिनी प्रदेशस्थित सामाजिक विकास मन्त्रालयको कार्यसम्पादनमा सुधार देखिएको छ । मन्त्रालयले विगतको तुलनामा गतवर्ष चालु र पुँजीगत खर्चमा बृद्धि भएको जनाएको छ ।

मन्त्रालयले आर्थिक वर्ष २०८०/०८१ को तुलनामा आव २०८१/०८२ मा ८ प्रतिशतले खर्चमा सुधार गरेको हो ।अघिल्लो वर्ष चालु र पुँजीगत गरी ६१ दशमलव ५ प्रतिशत बजेट खर्च भएको थियो । २०८१/०८२ मा ६९ दशमलव १ प्रतिशत खर्च गरेको छ । मन्त्रालयका महाशाखा प्रमुख रामहरि रिजालले २०८०/०८१ मा चालुतर्फ ६४ दशमलव ३ प्रतिशत खर्च गरिएको थियो । २०८१/०८२ मा चालु तर्फ ७१ दशमलव ७ प्रतिशत खर्च भएको छ भने पुँजीगततर्फ अघिल्लो वर्ष ४९ दशमलव ५ प्रतिशत र गत वर्ष ६५ दशमलव २ प्रतिशत खर्च भएको उनले बताए । 

मन्त्रालयका अनुसार २०८०/०८१ मा चालुतर्फ २ अर्ब ६ करोड ४९ लाख बजेटमध्ये १ अर्व ३२ करोड ७४ लाख रुपैयाँ खर्च भएको थियो । २०८१/०८२ मा १ अर्ब ७६ करोड ४९ लाख मध्ये १ अर्व २६ करोड ४९ लाख रुपैयाँ खर्च भएको छ । यसैगरी पुँजीगत खर्चतर्फ अघिल्लो वर्ष ४७ करोड ६९ लाखमध्ये २३ करोड ६२ लाख र गत वर्ष १ अर्व १५ करोड ५२ लाख बजेटमध्ये ७५ करोड २८ लाख रुपैयाँ खर्च भएको रिजालले जनाए ।

अघिल्लो वर्ष कुल ४ सय १९ वटा सञ्चालित आयोजनामध्ये २ सय ८३ वटा पूरा भएका थिए । जसमध्ये १ सय १४ वटा आयोजना चालु अवस्थामा छन् । भने २२ वटाको काम नै भएन । २०८१/०८२ मा ९ सय ५७ वटा आयोजनामध्ये ५ सय २६ वटा पूरा भइसकेका छन् भने ३ सय ४८ आयोजना चालु अवस्थामा छन् । ८३ वटा आयोजनाको काम हुन सकेको छैन ।

२०८१/०८२ मा लुम्बिनी प्रदेशका विद्यालयको संरचना निर्माणतर्फ नयाँ कक्षाकोठा (भवन) निर्माण ३ सय ९०, शौचालय ५०, विद्यालय भवनमर्मत ८२, सूचनाप्रविधि ल्याब स्थापना १२, विज्ञान प्रयोगशाला निर्माण ११, पुस्तकालय निर्माण ४, विद्यालय स्वास्थ्य सेवा २०, व्यवसायिक तथा सीपमूलक तालिम ५७ वटा, शिक्षक तालिम ४२ वटा समूह, प्रदेशबाट प्राप्त क्षमता विकास तालिम ४ वटा समूहमा भएका छन् ।

अघिल्लो आवमा विद्यालय स्वास्थ्य सेवा शून्य रहेकामा २०८१/०८२ मा २० वटा बनेका छन् । ‘गतवर्ष मन्त्रीज्यु केही ढिलो गरी मन्त्रालयको जिम्मेवारीमा आउनुभएको थियो, विविध कारण त्यतिबेलासम्म मन्त्रालयको काम त्यति प्रभावकारी थिएन,’ मन्त्रालयका महाशाखा प्रमुख रामहरि रिजालले भने, ‘मन्त्रीज्यु आइसकेपछि कामले तीव्रता पायो । धेरै काम प्रभावकारीरुपमा सम्पादन गर्न सक्यौं ।’