प्युठान — प्युठानमा यस वर्ष ९७ प्रतिशत क्षेत्रफलमा रोपाइँ सम्पन्न भएको छ । जेठको पहिलो साताबाट रोपाइँ सुरु भएको थियो । 

एकीकृत कृषि तथा पशुपन्छी विकास कार्यालयका अनुसार जिल्लाभर ६ हजार ५ सय २५ हेक्टर क्षेत्रफलमा रोपाइँ हुने गरेकामा यो वर्ष ९७ प्रतिशत अर्थात् ६ हजार ३ सय ३० हेक्टर क्षेत्रफलमा रोपाइँ सम्पन्न भएको हो ।

सिचाइँ सुविधा पर्याप्त हुँदा तथा लगातार वर्षा भइरहेकाले पनि जिल्लामा रोपाइँ सरदरभन्दा एक साता छिटो सकिएको कार्यालय प्युठानका प्रमुख विनोद शर्माले जानकारी दिए । झिमरुक नदी र यसका सहायक नदीमार्फत यहाँका प्रायजसो धान रोपाइँ हुने फाँटमा सिँचाइ सुविधा छ । केही भूभागमा आकासे पानीको भरमा रोपाइँ हुने पनि त्यो निकै कम छ । आकासे पानीको भर पर्नुपर्ने बाध्यता नभएकाले जिल्लामा धान रोपाइँ अन्यत्रको तुलनामा छिटो हुने गरेको छ ।