What you should know
भैरहवा — रूपन्देहीको भैरहवास्थित रोटरी क्लब अफ सेन्ट्रल लुम्बिनीले श्रवण शक्ति गुमाएका र बोल्न नसक्ने दुई बालकको उपचारका लागि आर्थिक सहयोग गरेको छ ।
क्लबको १० औं पदस्थापन कार्यक्रममा क्लबका अध्यक्ष विष्णु शर्माले ‘क्लबको पहिलो सेवा परियोजना’ अन्तर्गत श्रवण शक्ति र बोल्ने क्षमता नभएका जुम्ल्याहा बालक एरिक र इभान थारुको उपचारार्थ ६१ हजार रुपैयाँ सहयोग गरिएको जानकारी दिए ।
उक्त सहयोग क्लबका अध्यक्ष शर्मा, रोटरी डिस्ट्रिक्ट ३२९२ नेपाल–भुटानका डिस्ट्रिक्ट गर्भनर नोमिनी डा. ईश्वरीप्रसाद ढकाल लगायतले बालकका बुवा–आमालाई हस्तान्तरण गरेका हुन् ।
कपिलवस्तुको वाणगंगा नगरपालिका–३ स्थायी घर भई अहिले सिद्धार्थनगर–९ मा बस्दै आएका सन्तराम थारु र सुनिता कार्कीका साढे ४ वर्षका जुम्ल्याहा छोरा एरिक र इभानको जन्मजातै कान नसुन्ने समस्या छ । दुवै बालकको कानमा कक्लियर इम्प्लान्ट राख्न कम्तीमा ४० लाख रुपैयाँ लाग्ने चिकित्सकले जनाएका छन् ।
आर्थिक अवस्था कमजोर भएपछि परिवारले सहयोगको अपिल गरेका छन् । बालकको उपचारका लागि क्लबले अन्य रोटरी क्लब र संघसंस्थालाई समेत सहयोगको आग्रह गरेको छ । अध्यक्ष शर्माले सानो सहयोगले बालकको भविष्य उज्वल गराउन योगदान पुग्ने भएकाले सबैलाई सहयोग गर्न अपिल गरेको बताए ।
क्लबका पूर्वअध्यक्ष तथा सेवा परियोजना संयोजक हिराबहादुर शाहले जन्मजात श्रवण र बोली क्षमता नभएका बालकलाई सबै रोटेरियनहरूका तर्फबाट सहयोग उठाएर उपलब्ध गराइएको बताए । यसअघि सिद्धार्थनगर उद्योग वाणिज्य संघले दुवै बालकलाई १ लाख ४३ हजार रुपैयाँ सहयोग गरेको थियो ।
