चितवन — चितवन राष्ट्रिय निकुञ्जमा तैनाथ नेपाली सेनाले सौराहाका युवालाई कुटपिट गरेको घटनामा तीन बुँदे सहमति भएको छ । शुक्रबार पीडित पक्ष र सेनाको गुल्म पक्षबीच चितवन राष्ट्रिय निकुञ्जको पूर्वी सेक्टर कार्यालय प्रमुख लगायतका सरोकारवालाहरुको रोहबरमा सहमति भएको हो ।

बिहीबार कुटपिटमा परेका ३१ वर्षीय गोविन्द राउतको भरतपुरमा उपचार भइरहेको छ ।

घटनामा निकुञ्जमा तैनाथ नयाँ गोरख गणको सौराहामा तैनाथ ‘क’ गुल्मका दुधौरा पोष्टका एकजना प्युठ र दुईजना सिपाही संलग्न भएको जनाइएको छ । घाइतेको उपचारमा लाग्ने सबै खर्च सौराहाको गुल्मले बेहोर्ने सहमति भएको छ । त्यसैगरी घटनामा संलग्न भएको भनिएका गस्तीमा संलग्न सैनिकहरुलाई आवश्यक छानबिनपछि सैनिक ऐनअनुसार विभागीय कारबाही गर्ने पनि सहमति भएको छ ।

घाइते निको भएपछि सबै पक्ष बसेर मिलापत्र गर्ने सहमति पनि भएको छ । सौराहा आडको खोरसोर वन क्षेत्रमा उक्त घटना भएको थियो । घाइते राउतले गर्भवती श्रीमतीले निउरोको साग खाने भनेपछि स्थानीय महिलाहरुसॅगै जंगल गएको र फर्कंदा साँझ ७ बजेतिर गस्तीमा रहेका सैनिकसॅग भेट भएको बताए । ‘साथीहरु अर्को बाटो र म एक्लै अर्को छिट्टो निस्कने बाटो फर्कन लाग्दा सेनासॅग भेट भयो,’ उनले भने ।