भैरहवा — आर्थिक वर्षको अन्त्यमा मात्रै चालु र पुँजीगत खर्च ह्वात्तै वृद्धि गर्ने परम्परा रुपन्देहीमा पनि देखिएको छ । कोष तथा लेखा नियन्त्रक कार्यालय (कोलेनिका) का अनुसार जिल्लास्थित कार्यालयहरूले अन्य महिनाको तुलनामा असारमा धेरै खर्च गरेको देखिएको छ । 

असारमा मात्रै धेरै विकास निर्माणका कार्य भएर भुक्तानी नभएको कार्यालयले जनाएको छ । पुराना कामको खर्च पनि विविध कारण असारमै भुक्तानी गर्ने प्रचलनका कारण खर्च धेरै देखिएको कार्यालयको भनाइ छ । प्रमुख कोष नियन्त्रक मञ्जुकुमारी जैसी ढकालका अनुसार असारमा मात्रै पुँजीगततर्फ ३ अर्ब २९ करोड ४८ लाख ३३ हजार १ सय ८४ रुपैयाँ खर्च भएको छ । जुन कुल खर्च ८ अर्ब १७ करोड ४३ लाख ८ हजार ८ सय ७४ को ४० दशमलव ३३ प्रतिशत हो ।

आर्थिक वर्ष २०८०/०८१ को तुलनामा जिल्लाका संघीय कार्यालयहरूले पुँजीगततर्फ २०८१/०८२ मा १६७.७९ प्रतिशतले बढी खर्च गरेको बताइन् । विगतको तुलनामा समग्रमा जिल्लाको पुँजीगत खर्चलाई राम्रो मान्नुपर्ने उनको भनाइ छ । उनका अनुसार चालुतर्फ कुल १६ अर्ब ९१ करोड २३ लाख १० हजार ९ सय ६९ रुपैयाँ खर्च भएकोमध्ये असारमा मात्रै १ अर्ब ७९ करोड ३१ लाख ७२ हजार २ सय ४४ रुपैयाँ खर्च भएको छ । कार्यालयका अनुसार समग्रमा विगतको तुलनामा जिल्लामा पुँजीगत (विकास) खर्चमा सुधार देखिएको छ ।

‘आर्थिक वर्षको सुरुमा टेन्डर आह्वानमै ढिलाइ हुँदा बर्सेनि विकास खर्च न्यून भइरहेको छ,’ कार्यालय प्रमुख जैसी ढकालले भनिन्, ‘आर्थिक वर्ष २०८१/०८२ मा विगतका वर्षको भन्दा विकास खर्च सन्तोषजनक रहेको छ ।’

कार्यालयका अनुसार गत आर्थिक वर्षका लागि ३१ अर्ब ८० करोड ७ लाख ३० हजार ९ सय ३७ रुपैयाँ अख्तियारी मिलेको थियो । त्यसमध्ये पुँजीगततर्फ १८ अर्ब ४५ करोड ६० लाख ५४ हजार ९ सय ६९ र चालुतर्फ १३ अर्ब ३४ करोड ४६ लाख ७५ हजार ९ सय ६८ रुपैयाँ अख्तियारी आएको थियो । जिल्लामा अख्तियारी प्राप्त कुल बजेटको २५ अर्ब ८ करोड २७ लाख ४९ हजार ८ सय ४३ रुपैयाँ अर्थात् ७८.८७ प्रतिशत खर्च भएको छ । पुँजीगततर्फ कुल रकमको ८ अर्ब १७ करोड ४३ लाख ८ हजार ८ सय ७४ रुपैयाँ अर्थात् ६०.७२ प्रतिशत खर्च भएको छ ।

जिल्लामा चालुतर्फ कुल बजेटमध्ये १६ अर्ब ९१ करोड २३ लाख १० हजार ९ सय ६९ रुपैयाँ अर्थात् ९२.१९ प्रतिशत खर्च भएको छ । अघिल्लो आर्थिक वर्ष २०८०/०८१ मा ९१.३० प्रतिशत बजेट खर्च भएको थियो । कोलेनिकाका अनुसार राजस्व संकलन भने गत वर्षभन्दा बढेको छ। आर्थिक वर्ष २०८१/०८२ मा रुपन्देही जिल्लाबाट १ खर्ब २० अर्ब ६९ करोड ८८ लाख ४६ हजार ८ सय २६ रुपैयाँ राजस्व संकलन भएको छ । जुन अघिल्लो आर्थिक वर्ष २०८०/०८१ भन्दा १५.१६ प्रतिशतले बढी हो ।