काठमाडौँ — रुपन्देहीस्थित सीमा सुरक्षार्थ खटिएको सशस्त्र प्रहरीले एक वर्षमा सवा १३ करोडका भन्सार छलीका सामान बरामद गरेको छ । सशस्त्र प्रहरी बल नम्बर २७ हेड क्वार्टर गणले आर्थिक वर्ष २०८१/०८२ मा अवैध तरिकाले भित्र्याइएका सामान बरामद गरेको हो ।

गणका सूचना अधिकारी एवं डीएसपी मोहन न्यौपानेका अनुसार गत साउनदेखि असार मसान्तसम्म १३ करोड १० लाख ३९ हजार ९८९ रुपैयाँ बराबरका विभिन्न सामान बरामद गरिएको हो ।

डीएसपी न्यौपानेका अनुसार खुला सीमाको फाइदा उठाउँदै भारतीय बजारबाट नेपालतर्फ हुने गरेको तस्करी नियन्त्रणमा कडाइ गरिएपछि सामान बरामद गर्न सफलता मिलेको हो । उनका अनुसार सशस्त्रले एक वर्षमा लत्ताकपडा मात्रै २ करोड ७३ लाख ७७ हजार १७४ रुपैयाँ बराबरको बरामद गरेको छ । यस्तै, अन्य ट्रक, मिनी ट्रक, ट्याक्टर ८, कार, भ्यान, छोटा हात्ती १०, अटो रिक्सा ५, मोटरसाइकल १ सय ७५ र साइकल १० गरी २ सय ८ वटा सवारी नियन्त्रणमा लिइएको छ । यी सवारीलाई ४ करोड २२ लाख २७ हजार ४ सय १ रुपैयाँ मूल्य कायम गरी भन्सार तथा राजस्व अनुसन्धान कार्यालय बुझाइएको छ ।

राजस्व कार्यालयसँग संयुक्त तथा एकल रुपमा गरिएको गस्तीका क्रममा २ करोड १९ लाख ३० हजार ८४५ रुपैयाँ बराबरको सामान बरामद गरिएको डीएसपी न्यौपानेले बताए । उनका अनुसार ९५ लाख ५२ हजार ८९ रुपैयाँको चिनी बरामद गरिएको छ । यस्तै, दाल, चामल, मटर, चना लगायतका खाद्यान्न ७ लाख ८७ हजार ५५०, कस्मेटिक १४ लाख ९६ हजार २८५, भाडाबर्तन ९९ हजार ८०२, मोबाइल फोन ९ लाख, प्याज ५ लाख २१ हजार ६७०, हार्डवेयर ७ लाख ९६ हजार २२३ रुपैयाँ बराबरको बरामद गरिएको छ ।

मोटर, मोबाइल पार्टस्, इलेक्ट्रिक्स सामान ७५ लाख ७६ हजार ९८३, नगद (नेपाली तथा भारतीय रुपैयाँ) २० लाख ६० हजार, आयुर्वेदिक तथा एलोपेथिक औषधि ४६ लाख ३ हजार ४८६, मदिरा ३६ हजार मूल्य बराबरको बरामद गरिएको छ । यसैगरी ब्रोइलर कुखुरा, मासु, माछा, किराना सामान, रासायनिक विषादी, हरियो तरकारी, पटका, पशु चौपाया, नदीजन्य पदार्थ पनि लाखौं रुपैयाँको बरामद गरिएको डीएसपी न्यौपानेले बताए ।

राजस्व छली गरी चोरी निकासी–पैठारी गर्न लागिएका उल्लेखित मूल्य कायम भएका सामान बरामद गरी आवश्यक कारबाहीका लागि भैरहवा भन्सार, राजस्व अनुसन्धान, स्थानीय तह र पशु तथा प्लान्ट क्वारेन्टाइन कार्यालयहरुमा बुझाइएको सशस्त्रले जनाएको छ ।