नेपालगन्ज — बाँकेको इलाका प्रहरीले भारतबाट सुनका गहना र नगद चोरी गरी आएका ६ जनाको समूहलाई पक्राउ गरेको छ ।

कोहलपुर नगरपालिका वडा नं.११ स्थित रहेको होटल न्यू कालिकोटेमा कोठा भाडा लिई बसेका उनीहरुलाई भारतबाट सुनका १५ तोला २५ (लाल पथ्यर सहित) तौल भएका सुनका गरगहनाहरु, नगद नेपाली सात लाख सतासी हजार सहित सोमबार दिउँसो २ बजे पक्राउ गरीएको हो ।

ईलाका प्रहरी कार्यालय कोहलपुरकी डीएसपी लक्ष्मी खनालका अनुसार चोरीमा संलग्न आरोपमा जिल्ला कालिकोट रासकोट नगरपालिका वडा नं.१ बस्ने ४२ वर्षीय मनबहादुर शाही, कालिकोट रासकोट नगरपालिका वडा नं. १ का ४२ वर्षीय तेजबहादुर शाही, कालिकोटकै सान्नी त्रिवेणी गाउँपालिका वडा नं.८ बस्ने १८ वर्षीय पंकज के.सी., कालिकोट नरहरीनाथ गाउँपालिका वडा नं. ९ बस्ने २८ वर्षीया सरिता शाही, सान्नी त्रीवेणी गाउँपालिका वडा नं. ८ बस्ने ४५ वर्षीय प्रेम बहादुर खत्री र ३८ वर्षीया अनिता खत्री रहेका छन् । 

कोहलपुर नगरपालिका वडा नं.११ स्थित रहेको होटल न्यू कालिकोटेमा कोठा भाडा लिई बसेका उनीहरुलाई मानिसहरूले भारतबाट सुनका गहना र नगद चोरी गरेर आई बसेको भन्ने सूचना अनुसार ईलाका प्रहरी कार्यालयबाट प्रहरी निरीक्षक रेशमलाल पौडेलको कमाण्डमा ७ जनाको प्रहरी टोलीले उक्त स्थानमा हेर्दा उनीहरुको साथबाट सुनका गरगहना र नगदसहित उनीहरुलाई नियन्त्रणमा लिइएको हो ।